Kandidatu Prezidente Repúblika independente períodu 2022-2027, Constâncio Pinto ‘Terus’. Imajen TATOLI/Anito Soares

DILI, 16 marsu 2022 (TATOLI)—Kandidatu Prezidente Repúblika (PR) independente ba períodu 2022-2027, ho númeru sorteiu 11, Constâncio da Conceição Pinto ‘Terus’, mai ho lema ‘Hametin Estadu direitu demokrátiku’ no ‘Hapara povu nia terus no hamaran povu nia mata-wen’. 

Tuir Constâncio Pinto, Konsolidasaun Estadu Direitu Demokrátiku ho objetivu atu serbisu hamutuk ho órgaun soberanu hotu, atu haree sistema ne’ebé sai impedimentu ba dezenvolvimentu ekonómiku tenke muda no altera.

“Tenke altera buat hirak ne’ebé ladi’ak, tanba bainhira ita restaura independénsia, ita depende barak liu ba asesór no ba buat sira ne’ebé mai hosi li’ur, ne’ebé sai impedimentu ba ita-nia dezenvolvimentu rasik. Tenke haree ba ita-nia governasaun, saida mak ladi’ak, saida mak impede dezenvolvimentu, tenke buka atu konsolida liuhosi konsulta, diálogu no entendimentu komun entre órgaun Estadu hotu,” dehan Kandidatu PR ne’e.

Notísia relevante: Constâncio Pinto promete sei prioritiza asuntu neen no PED bainhira eleitu ba PR

Nia konsidera, Prezidente Repúblika povu rasik mak hili, ne’ebé iha poder morál no polítika atu influénsia desizaun polítika órgaun seluk no koopera ho sira, ne’ebé la sai impedimentu ba instituisaun sira.

Enkuantu, Hamaran povu nia mata-wen, hanesan hatutan liafuan hosi Antigu Prezidente dahuluk Timor-Leste, Francisco Xavier do Amaral.

“Ida-ne’e realidade ne’ebé ita haree iha ita-nia kontestu, katak povu barak mak sei terus hela no enfrenta difikuldade oin-oin, hanesan falta hahán, laiha asesu ba fasilidade saúde, edukasaun no seluk tan,” Constâncio Pinto deskreve.

Iha sorin seluk, nota katak Timor-Leste hanesan nasaun ne’ebé nakonu ho rekursu naturál barak no iha investimentu fundu petrolíferu, maibé povu nia moris la refleta ba rekursu ne’ebé iha.

“Tanba ne’e, bainhira hetan fiar, ha’u hakarak serbisu ho Governu hodi halo programa ne’ebé responde ba povu nia moris. Ha’u sei to’o munisípiu hotu hodi haree realidade no kondisaun vida povu nia, nune’e bele iha informasaun konkreta hodi bele serbisu hamutuk ho Governu hodi aloka osan no halo programa hodi responde ba situasaun reál,” nia tenik.

Envolvimentu iha luta independénsia

Constâncio Pinto hanesan kazada ho Gabriela Pinto no iha oan rua, Tilson no Tima.

Nia dedika an no enerjia ba independénsia no auto-determinasaun Timor-Leste nian, ne’ebé iha tinan 1984, hahú envolve iha prosesu luta ba independénsia hanesan Kombatente no Enfermeiru.

Iha tinan 1989, ho nia maluk seluk, ba dahuluk organiza protestu ba dame durante vizita Amu Papa João Paulo II iha Tasi-tolu.

Aleinde ne’e, Constâncio Pinto eleitu nu’udar Sekretáriu Komité Ezekutivu ba Konsellu Nasionál Rezisténsia Maubere (CNRM, sigla portugés) iha Frente Klandestina no nu’udar líder importante ida ba movimentu klandestina, ne’ebé hamutuk ho membru Komité Ezekutivu, organiza asaun pasífika lubuk ida inklui manefestasaun 12 novembru 1991, ne’ebé rezulta joven hamutuk 271 sai vítima Masakre iha rate Santa Cruz.

Envolvimentu iha rai-li’ur

Iha tinan 1992, Constâncio Pinto hala’o viajen ba Portugal no ikus mai ba Estadu Unidu Amérika (EUA), hodi hahú kampaña ba kauza Timor-Leste iha rai-li’ur.

Iha estranjeiru, nia fó apoiu ba Frente Diplomátika, hamutuk ho Diplomata Veteranu hanesan José Ramos Horta, Marí Alkatiri, José Luís Guterres, Rocke Rodrigues, João Carrascalão no seluk tan, hodi halo misaun diplomátika to’o funu ramata.

Halo mós testamuña ba kongresu EUA, iha Komité Deskolonizasaun Nasaun Unida no Komisaun Direitu Umanu Nasaun Unida ihaa Jenebra, partisipa diálogu Intra-Timorense ne’ebé realiza iha Austria, ne’ebé fasilita hosi Nasaun Unida.

Hafoin restaurasaun Independénsia Timor-Leste, Terus sai Diplomata Seniór Timor-Leste ba dahuluk, ne’ebé hala’o knaar iha Washingtin DC, nu’udar Embaixadór no ikus mai asume knaar hanesan Vise-Ministru Negósiu Estranjeiru no Kooperasaun.

Ho konfiansa ne’ebé iha ba Terus, iha fevereiru 2015, nia hahú nia knaar nu’udar Vise-Ministru Komérsiu Indústria no Ambiente no ikus mai asume kargu hanesan Ministru Komérsiu Indústria no Ambiente.

Hafoin restaura independénsia iha maiu 2002, Constâncio Pinto hanesan diplomata dahuluk ne’ebé halo ninia knaar iha estranjeiru hodi defende interese nasionál no promove nia-rain iha espeitu hotu, hanesan polítika, militár no ekonomia. Tanba  ne’e, nia koñesidu hanesan Diplomata ne’ebé iha koñesimentu kle’an kona-ba rai-laran no rai-li’ur.

Iha tinan 2009, Constâncio Pinto aprezenta ninia karta kredensiál ba Prezidente Barack Obama, hanesan Embaixadór Estraordináriu no plenipotensiáriu Repúblika Demokrátika Timor-Leste (RDTL) ba EUA, ne’ebé asume kargu iha Washington DC.

Nune’e mós, nia asume ona knaar hanesan Diretór Jerál Relasaun Exteriór iha Ministériu Negósiu Estranjeiru Timor-Leste iha juñu 2008 to’o outubru 2009 no ikus mai sai mós Vise-Ministru Negósiu Estranjeiru no Kooperasaun.

Ho konfiansa ne’ebé iha ba Constâncio Pinto, iha fevereiru 2015, hahú nia knaar hanesan Vise-Ministru Komérsiu Indústria no Ambiente no ikus mai sai Ministru Komérsiu Indústria no Ambiente.

Edukasaun  

Constâncio Pinto antes ne’e hasai estudu mestradu iha área Relasaun Internasionál iha Culombia University no hasai kursu iha School of International and Public Affair (SIPA).Aleinde ne’e, hasai Lisensiatura iha área dezenvolvimentu iha Brown University iha Providence, Rhode Island. Ho esperiénsia serbisu no edukasaun ne’ebé iha, Diplomata ne’e fluente iha lian Tetum, portugés, indonéziu no inglés. 

Antes ne’e, Constâncio Pinto hakrek livru istóriku ho títulu ‘East Timor’s Unfinished Struggle: Inside the Timorense Resistance (1996) no hakerek mós artigu balun kona-ba luta povu timor-oan  ne’ebé publika iha jornál Los Angeles Times, Washington Post, no jornál seluk tan.

Atividade atuál

Atuál nia asume kargu hanesan Diretór Ezekutivu Nasionál ba Ekipa Dezenvolvimentu Kompaktu Timor-Leste (CDT-TL), ne’ebé iha ligasaun ho EUA liuhosi Millenium  Challenge Corporation (MCC), ne’ebé atu hetan asesu ba fundu apoiu finanseiru ba dezenvolvimentu ekonómiku Timor-Leste.

Aleinde ne’e, lidera ekipa hakerek istória rezisténsia no luta independénsia Timor-Leste.

Jornalista : Julia Chatarina

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here