Fatin ba debate kandidatu Prezidente Repúblika períodu 2022-2027 iha Hotel Novo Turismo, Dili, tersa (15 marsu 2022). Imajen/Espesiál.

DILI, 15 marsu 2022 (TATOLI)— Portavóz ekipa susesu, Kandidatu Prezidente Repúblika númeru sorteiu 16, António da Conceição “Kalohan”, konsidera Komisaun Nasionál Eleisaun (CNE, sigla portugés) falla totál organiza eventu debate Kandidatu Prezidente Repúblika períodu 2022 to’o 2027 na’in-16 ne’ebé hala’o transmisun direta hosi kanál GMN TV. 

“Ha’u dehan CNE falla totál organiza eventu debate Kandidatura Prezidente Repúblika tinan ne’e,” Reprezentate legál ekipa susesu Kalohan hateten ba Agência TATOLI, hafoin ramata  partisipa  debate Kandidatura PR sesaun dahuluk iha otél Novu-Turizmu, tersa ne’e.

Notísia relevante: Debate para dalan klaran, Prezidente CNE dehan normál

Razaun falla, Portavóz ekipa susesu kandidatu Mariano Assanami Sabino Lopes ne’e dehan tanba Estadu Timor-Leste iha televizaun ho naran TVTL, maibé CNE lakohi uza espasu ne’e ho razaun karun no laiha kualidade, nune’e uza fali TV privadu ne’ebé aat liután.

Portavós ekipa susesu no atual Sekretáriu Jerál Partidu Demokrátiku (PD), António da Conçeição “Kalohan”. Imajen TATOLI/Egas Cristóvão

 “Loloos ne’e  ita uza  Rádiu Televisaun Timor-Leste, Empreza públika (RTTL,E.P) ne’ebé mak ho fasilidade di’ak no asesu ba to’o iha foho ne’ebá  tanba liuhosi debate sira hanesan ne’e,  ita hakarak atu eduka sosiadade ita nian, hodi bele vota, maibe debate ne’e mosu erru barak razaun la hatene tanba sá maka GMN halo ida ne’e no ida ne’e ha’u konsidera hanesan erru bo’ot ida ne’ebé komete hosi CNE,” Ekipa susesu ne’e lamenta.

Alende ne’e, nia konsidera CNE inkapasidade organiza debate tanba haree ba mekanizmu ida konvida ema hotu, maibé ekipa susesu hosi kandidatu sira nian laiha fatin atu tuur.

Nune’e, nia kompara, debate kandidatu Prezidente Repúblika iha tinan lima ba  kotuk di’ak liu tinan ne’e.

“Tanba ita haree ba kualidade transmisaun atu fó ba públiku ne’e laiha pur kauza internet ne’e ita komprende, mas forma organiza debate ne’e aat tebes ne’ebé kapasidade CNE kiak demais,” nia akresenta.

Kona-bá pergunta sira, nia dehan kualidade pergunta ne’ebé mak  husu ba kandidatu  Prezidente Repúblika de’it mós barak liu mak husu fali kompeténsia ezekutivu ka Governu nian.

“Husu fali pergunta ne’ebé maka Governu ninian papél ba fila-fali Prezidente Repúblika, Prezidente Repúblika  ne’e la’ós atu ko’alia kona-ba problema feto ninian, ha’u hanoin pergunta ne’e laiha fatin atu husu ba kandidatu Prezidente Repúblika sira,” atuál Deputadu bankada PD ne’e kestiona.

CNE mós la hatene  kontestualiza pergunta kona-bá mandatu Prezidente Repúblika nian ida agora, maibé husu fali pergunta sira hanesan fali ezame nasionál ba kandidatu sira.

“Foti envelope tuun sa’e hanoin dehan kreatividade ida ne’e, mas la demostra kapasidade atu dehan katak Prezidente Repúblika, loloos husu tanba sa mak kandidata an ne’e ba atu halo saida iha situsaun ida agora nian ne’e. Purtantu ha’u hanoin sira ne’ebé organiza ne’e mós la hatene Prezidente Repúblika ninian papél, mak buat  sai tiha hanesan ne’e,” Nia sublina.

Hataan kona-bá kestaun ne’e, Vise Prezidente CNE, Domingos Barreto hateten, CNE hili GMN TV halo tranzmisaun ba eventu ne’e la’ós CNE fó de’it, maibé liuhosi prosesu.

“CNE la indika GMN, maibé liuhosi konkursu ne’ebé nia maka manán, nune’e liuhosi prosesu legál no tuir rekezitu konkursu nian, ne’ebé CNE la indika kompañia ida  mai atu halo transmizaun ida ne’e,” Vise Prezidente CNE Domingos Barreito.

Kona-bá finasiamentu GMN mak valór tun liu  ho montante $12.000, kompara ho RTTL,E.P mai ho kustu tranzmisaun purvolta $26.500.

“Haree ida ne’e mak CNE fó ba GMN halo tranzmisaun,” nia akresenta.

Maski nune’e, nia dehan CNE la espera iha tranzmisaun ne’e mosu fallansu tékniku barak hodi fó impkatu ba populasaun sira atu asiste no akompaña debate ne’e.

“Ami mos lamentavel ho fallansu tékniku ne’e, tanba   la transmite ho didi’ak , hanesan ita agora ita haree daudaun ne’e, ne’ebe ha’u hanoin ida ne’e tékniku iha sira (GMN) ninian responsavél, CNE la tama ba ne’ebá, hanesan sira dehan iha kestaun internet, ita tenta haree took tuir mai buat sira ne’e la’o di’ak fali ka lae,”  Vise Prezidente CNE  mós lamenta.

Notísia relevante: Pergunta debate públiku ba kandidatu PR sei fahe ba sesaun tolu

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here