Kandidatu Prezidente Repúblika ba períodu 2022-2027 ho númeru sorteiu 10, Hermes da Rosa Correia Barros “Sikiliras Aihai”. Imajen/espesiál.

DILI, 16 marsu 2022 (TATOLI)—Kandidatu Prezidente Repúblika ba períodu 2022-2027 ho númeru sorteiu 10, Hermes da Rosa Correia Barros “Sikiliras Aihai”, kandidata an ba PR mai kedas ho vizaun ‘Hamutuk harii Timor ida nabilan, ba timór-oan hotu’.

Hermes “Sikiliras Aihai” hato’o komprimisu ba inan-aman, katuas no ferik sira, joven feto-mane sira no povu Timor-Lorosa’e hosi tasi feto tasi mane katak laiha buat ida mak sai dezafiu ba mehi no esforsu sira atu halo mudansa ba vitória ida-ne’ebé povu mak sai na’in ba susesu sira hodi hetan moris di’ak.

“Ha’u sei serbí imi ho fuan, Ba Timor-Lorosa’e ida moris iha dame no pás,” kandidatu ne’e hateten iha ninia kampaña eleitoral.

Notísia relevante:  Hermes Barros hakarak promove Timor-Leste ba investidór sira

Kandidatu PR independente ne’e hakarak atu defende povu no nasaun ne’e bainhira nia sei iha eskola pre- sekundária, ho nune’e tempu lori jerasaun otas foun ne’e mai to’o ohin loron sai nuudar nia mehi ida.

Atu realiza nia mehi ne’e, Hermes hakarak didika nia-an ba sai servidór ka atan ba povu Timor-Lorosa’e hodi husu ba povu hosi rai ulun to’o rai ikun husi tasi feto to’o tasi mane karik fiar iha jerasaun otas foun hodi lori Timor-Leste ba hasoru futuru ida nabilan liu ho moris ida  iha prosperiadade no justisa ida ekelibru ba ema hotu.

Tanba, nia dehan, tempu to’o ona atu hamaran povu nia mata-been, tempu to’o ona atu família ida moris iha uma ida iha bee, ahi no iha ai-han ba sira.

Biografia

“Sikiliras Aihai” nu’udar naran kódigu iha tempu rezisténsia nian hosi Hermes da Rosa Correia Barros, no timor-oan ida hosi jerasaun otas foun ne’ebé iha hanoin da’ak no mehi ida ba povu no nasaun atu moris iha dame, pás no unidade.

Hermes moris iha Ainaro 24 maiu 1972 husi familia simplis ran domin husi aman- inan benedito Barros no Alcina Correia. Hermes ho nia maun alin hamutuk nain sia, nune’e Hermes Iha tinan 1982 to’o 1989, hahú nia estudu iha koléjio iha misaun katólika iha munisípiu Ainaro no iha tinan 1989 to’o 1991, no ramata  nia eskola sekundáriu iha São Pedro Comoro-Dili.

Iha tinan 1991 to’o 1994, Hermes hala’o nia estudu lideransa iha Jawa-Indonézia, ho nune’e jerasaun otas foun ne’e hatudu nia lideransa hosi nia estudu hodi lidera postu Laclo hanesan administradór iha tempu Governu Indonézia nian.

“Sikiliras Aihai” naran kódigu hosi luta libertasaun nian ne’ebé hanesan membru klandestina ida iha tempu rezisténsia halo kolaborasaun serbisu sekretu sira ho responsavél kolaborador rede klandestina sira hahú hosi tinan 1987 to’o Timor-Leste hetan nia ukun rasik-an.

Hermes mós sai hanesan membru permanente forsa Repetil iha tinan 1998 no pesoa importante ba kampaña CNRT iha konsulta populár ba ukun rasik-an nian iha territóriu Timor-Leste.

Hermes Barros iha tinan 2007 to’o 2011 hakna’ar-an hanesan membru Parlamentu Nasionál iha segundu legislatura husi Partido Demokratiku Sosiál hodi ko’alia defende povu nia interese iha tempu ne’ebá.

Nune’e hanesan ajente Estadu la sura nia kolen, Hermes kontinua servi estadu liuhusi nia kna’ar sira iha governu hanesan Direitor Jerál iha Ministériu Ekonomia no mós hanesan Direitór Jerál iha Ministériu Estatál kuaje tinan balun, iha nia lideransa sempre hatudu nia kapasidade lideransa nian ba nia funsionáriu sira iha servisu hodi serbí povu no nasaun ho fuan no domin.

“Sikiliras Aihai” hanesan jerasaun otas foun ida ne’ebé defende joven no povu sira nia direitu iha tempu sira krusiál nian, hanesan administrador Postu Laklo, Hermes uza nia kna’ar hodi halo impedimentu ba movimentasaun husi grupu milisia sira hosi Baucau, Lospalos, Viqueque atu ba Dili hodi halo asaun brutalizmu  hasoru maluk independista sira, maibé la konsege tanba hetan blokeia hosi lideransa “Sikiliras Aihai” ne’ebé organiza joven sira halo asaun blokeia ba estrada hodi impede sira-nia movimentu ba Dili iha tempu ne’ebá.

Iha situasaun ne’e,  Hermes hetan kedas xamada hosi Administradór Munisípiu no grupu milisia sira buka tuir Hermes atu exekusi alias oho. Maibé, ho Maromak no matebian sira nia tulun la konsege eskapa husi milisia sira nia brutalizmu,

Nune’e, Hermes fila ba Dili hasoru Governador tempu ne’ebá hodi hato’o nia auto defeza kona-bá asaun ne’ebé mak  halo nuudar Administradór postu halo atu salva guarda de’it maluk timór-oan sira seluk iha Dili atu labele hetan susar hosi ak tu milisia sira nian.

Tempu ne’ebá autoridade Indonézia nian hapara nia hosi nia kargu nuudar Administradór Postu Laklo, maibé nia la preokupa ho kargu ne’e, tanba iha hanoin ida hosi Hermes katak timór- oan tenke  iha matenek hodi halo buat ruma ba povu no nasaun ne’e, Hermes diside nia-an hodi ba kontinua nia eskola iha Jawa Indonésia hanesan buka’e ida ba povu no Nasaun TL iha futuru.

Notísia relevante:  Kandidatu PR Hermes Barros husu veteranu kuda prinsípiu patriotizmu ba joven sira

Jornalista :  Florencio Miranda Ximenes

Editór       :  Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here