Ekipa AS Ponta Leste. Imajen/Espesiál

DILI, 16 marsu 2022 (TATOLI)– Treinadór Prinsipál Ekipa Primeira Divizaun Liga Futeból Timor-Leste (LFTL) AS Ponta Leste, Francisco Araújo, hateten, simu ona kontaktu hosi jerente klube atu mantein nafatin nia hanesan treinadór ba époka 2022.

“Ha’u simu ona kontaktu hosi klube atu mantein nafatin hanesan treinadór. Diretór tékniku Eduardo Pereira mak husu nafatin ha’u atu mantein iha époka ne’e, sé sira fó nafatin konfiansa ha’u sei mantein,” dehan Francisco ba Agência TATOLI iha edifisiu FFTL Dili, kuarta ne’e.

Nia dehan, sei halo tuir de’it orientasaun ne’ebé klube fó ba nia atu fó treinamentu ba jogadór sira hodi alkansa saida mak klube hakarak no tarjetu ba LFTL époka 2022.

“Se klube fó sira nia tarjetu mai ha’u mak ha’u sei aprezenta fali ha’u nia proposta ba sira, rekursu saida mak sira atu prepara atu hetan tarjetu di’ak,” nia dehan.

Iha époka kotuk tarjetu klube fó ba nia mak mantein iha Primeira Divizaun, maibé konsege mantein duni no iha tinan ne’e mak hakarak kampiaun, nune’e prontu importante klube tenke prepara rekursu hanesan jogadór ne’ebé di’ak.

Tuir nia haree, klube hotu iha mehi no ambisaun hakarak sai kampiaun ba LFTL maibé buat hotu fila ba klube nia jestaun liuliu finansiamentu tenke jere halo di’ak no prepara jogadór tenke sufisiente.

Ponta Leste fó konfiansa ba Fransico hanesan treinadór iha 2021 no konsege lori Ponta Leste mantein iha Primeira Divizaun. Ho kualidade ne’ebé mak treinadór ho lisensa B ne’e iha halo Ponta Leste nia laran monu nafatin ba nia iha 2022 ne’e nafatin mantein nia.

Francisco tama ba Ponta Leste hodi substitui treinadór Eduardo Pereira tanba Eduardo asume fali kargu foun iha Federasaun Futeból Timor-Leste (FFTL) hanesan treinadór ba selesaun nasionál U-19.

Alende asume kargu hanesan treinadór prinsipál iha Ponta Leste, hetan mós fiar hosi FFTL hanesan asistente treinadór ba selesaun nasionál U-19.

Jornalista: Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here