VIQUEQUE, 16 marsu 2022 (TATOLI)—Komisaun Nasionál Eleisaun (CNE, sigla portugés) Viqueque identifika durante períodu kampaña eleitorál, iha Kandidatu Prezidente Repúblika (PR) balun komete irregularidade administrativa.
“Relasiona ho órariu ba kampaña iha Viqueque ramata iha loron 12 marsu, nune’e atividade mini kampaña ne’e ekipa susesu balun la submete órariu ba CNE, maibé iha terreinu sira realiza atividade, ne’e hanesan irregularidade administrativa,” Diretór Servisu CNE Viqueque, Honorio Cruz da Silva, informa ba Agência TATOLI, iha salaun administrasaun Viqueque, kuarta ne’e.
Notísia relevante: CNE Viqueque realiza paktu eleisaun pasífiku
Iha kandidatura na’in-tolu hanesan Francisco Guterres ‘Lú Olo’, Armanda Berta dos Santos no José Ramos Horta mak submete oráriu mini kampaña ba CNE nasionál, seluk lae.
Maski nune’e, mini kampaña kandidatu númeru sorteiu 06 realiza iha suku Matahoi, postu Uatulari iha loron 15 marsu no kandidatu númeru sorteiu 14 realiza iha suku Afaloikai, postu Uatulari iha loron 15 marsu.
“Bazeia ba oráriu ne’ebé iha CNE, ohin ita laiha mini kampaña iha munisípiu Viqueque tanba órariu laiha. Karik ohin ekipa kandidatu balun halo, ami sei halo identifikasaun,” Diretór tenik.
Durante CNE halo observasaun iha atividade kampaña eleitorál iha munisípiu Viqueque haree katak la’o ho di’ak.
Tuir oráriu hosi nasionál kampaña ba Eleisaun Prezidensiál hahú hosi loron 02 to’o 16 marsu.
Jornalista : Vitorino Lopes da Costa
Editora : Julia Chatarina
