VIQUEQUE, 16 marsu 2022 (TATOLI)—Komisaun Nasionál Eleisaun (CNE, sigla portugés) durante halo observasaun iha kampaña prezidensiál, deteta katak funsionáriu públiku balun partisipa.
“Ami konsege deteta funsionáriu lubuk ida maka partisipa atividade kampaña eleitorál,” Diretór Servisu CNE munisípiu Viqueque, Honorio Cruz da Silva, informa ba Agência TATOLI, iha salaun munisipál, kuarta ne’e.
Notísia relevante: CNE Viqueque realiza paktu eleisaun pasífiku
Maski nune’e, CNE laiha númeru serteza funsionáriu públiku ne’ebé partisipa atividade, tanba balun foti lisensa espesiál no lisensa anuál.
“Ami sei la sura loron férias ne’ebé funsionáriu sira partisipa. Ami sei sura maka oras serbisu, maibé funsionáriu sira ba tuir fali kampaña,” nia dehan.
Tanba ne’e, CNE sei tetu oráriu efetivu serbisu, hodi identifika funsionáriu ninia auzénsia iha kampaña ne’ebé prejudika knaar funsionáriu hanesan servidór estadu.
“Funsionáriu públiku ne’ebé partisipa ami deteta hotu ona, ami sei komunika ba instituisaun sira ne’ebé haknaar ba hodi hetan informasaun no dadus detallu liután. Tanba ne’e, ami agora seidauk fó sai númeru partisipante sira, maibé prosesu identifikasaun ramata ami sei fó sai,” nia akresenta.
Jornalista : Vitorino Lopes da Costa
Editora : Julia Chatarina
