Materiál kampaña no propaganda eleitorál ne’ebé destaka iha munisípiu Liquiçá. Imajen espesiál.

BAUCAU, 16 marsu 2022 (TATOLI) – Komisaun Nasionál Eleisaun (CNE, sigla Portugés) Munisípiu Baucau, hein oreintasaun hosi nasionál atu hamoos materiál kampaña no propaganda eleitorál hosi fatin públiku.

Diretór CNE Baucau, Esmeraldo Damião Belo, esplika, tuir kalendariu, kuarta ne’e kampaña eleitóral ba kandidatura Prezidente Repúblika finaliza ona no nafatin hein oreintasaun hosi nasionál atu halo limpeza ba atributu kampaña nian iha Baucau.

“Ita hein orientasaun hosi nasionál mak foin halo limpeza kona-ba propaganda kampaña eleitóral sira. Kampaña remata normalmente ita ba halo limpeza ba panfletu-sira ne’e,” Diretór CNE Baucau hateten iha Vila Nova, kuarta ne’e.

Esmeraldo akresenta, limpeza ba atributu sira sei hala’o hamutuk loron ida de’it ho Munisípiu 11 no Rejiaun Administrativa Espesiál Oecuse Ambeno (RAEO) bainhira hetan ona oreintasaun hosi CNE nasionál.

CNE sei halo koordenasaun ho Polísia Nasionál Timor-Leste (PNTL) Baucau hala’o limpeza ba atributu kampaña hanesan panfletu, materiál kampaña iha fatin públiku.

Regulamentu kampaña no propaganda eleitorál

Bazea ba Dekretu Governu númeru 5/2017, loron 27 fevereiru kona-ba regulamentu kampaña no propaganda eleitorál, artigu 15 alínea dahuluk hateten, kandidatu sira tenke hamoos materiál kampaña propaganda ho prazu semana-ida, hahú loron tuir mai hafoin kampaña eleitorál.

Alínea daruak hosi artigu 15 ne’e mensiona, kandidatu hirak-ne’ebé hakat ba segunda volta sei bele kontinua hala’o nia kampaña propaganda (sei hein rezultadu eleisaun ronde dahuluk).

Alínea datoluk hosi artigu 15 ne’e fundamenta, bainhira materiál sira ladauk limpeza tuir tempu, CNE iha devér hamutuk autoridade seguransa limpeza no dahaat kustu operasaun ba limpeza sei apoia hosi kandidatura sira.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here