Brigadista 60 ho ekipa STAE RAEOA hahú verifika buletin votu. Imajen Tatoli/Abílio Elo Nini.

DILI, 16 marsu 2022 (TATOLI)— Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten bulletin votu 10% ne’ebé mak hodi responde ba bulletin ne’ebé mak foer no nakles.

Notísia Relevante: STAE-CNE verifika bulletin votu 138 labele uza tanba nakles

“Ita iha eleitór rihun 859.613 aumenta ho 10%, entaun signifika 900.000-resin mak hosi 10% ne’e mak lori responde ba buletin votu ne’ebé mak aat no nakles sira iha munisípiu,” Acilino hateten ba Agência TATOLI, nia knaar fatin Caicoli, kuarta ne’e.

Tuir nia, iha prosesu verifikasaun ba buletin votu iha munisípiu inklui Rejiaun Administrativa Espesiál Oé-Cusse Ambeno (RAEOA), iha buletin balun mak foer no nakles tanba impaktu hosi transporta hosi nasionál ba munisípiu no foer tanba bainhira halo produsaun ho nia kuantidade boot mak tinta fakar iha leten.

Nia dehan, iha verifikasaun ne’e munisípiu sira kuaze buletin votu foer no aat hanesan iha Covalima iha 138, Aileu 78 kompostu hosi buletin votu nia númeru seriál laiha hamutuk 48, buletin votu nia númeru seriál dobru hamutuk 10, buletin votu nakles iha 10 no buletin votu noda ka tinta kona hamutuk 18, no ida-ne’e STAE sei prenxe iha akta no tau karimbu la uza nian.

“Identifikasaun buletin votu ne’ebé mak aat ka nakles ka nia númeru seriál laiha ne’e, STAE sei prenxe iha iha akta. Bainhira entrega akta sei hateten iha ne’ebá katak hira mak kansella no hira mak foer. STAE iha mekanizmu kontrolu ne’ebé mak rigorozu tebes,” nia hateten.

Kona-ba urnas ne’ebé mak monu iha área Tunubibi, suku Tapo-Memo, postu administrativa Maliana ne’e, Diretór Jerál hateten urna mamuk nian.

“Ida-ne’e akontese tanba urna kesi la metin iha karreta laran no urna ida de’it mak monu maibé motorista foti no situsaun rezolvidu kedas,” nia dehan.

Notísia Relevante: Buletin votu 198 iha RAEOA inválidu

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here