Kandidatu Prezidente Republika, Armanda Berta dos Santos. Imajen Tatoli/Francisco Sony.

DILI, 16 maret 2022 (TATOLI)—Iha istória polítika Timor-Leste nian, hakerek tebes ho tinta osan-mean, katak feto Timor-Leste dahuluk ne’ebé Xefe Governu fó responsabilidade hodi assume kargu iha VIII Governu Konstitusionál hanesan Vise Primeira Ministra no Ministra Solidáriedade Sosiál no Inkluzaun (MSSI).

Feto timor-oan ne’e mak Armanda Berta dos Santos ne’ebé daudaun ne’e lidera Partidu Kmanek Haburas Unidade Nasionál Timoroan (KHUNTO) ne’ebé ninia laen-kaben José dos Santos ‘Naimori’ harii.

Iha 2022 ne’e Partidu KHUNTO deside lori Armanda Berta dos Santos sai kandidata Prezidente Repúblika 2022-2027 hodi compete ho kandidatu na’in-15 sira seluk ne’ebé iha mehi ne’ebé hanesan hakarak tuur iha kadeira manas Prezidente repúblika nian iha Palásiu Prezidensia Nicolau Lobato, Bairru Pite, Dili, sai hanesan Xefe Estadu.

Nu’udar feto timor-oan ne’ebé interese ba povu no nasaun Timor-Leste iha mehi ba prioridade prinsipál maka kontribui ba dezemvolvimentu nasionál.

“Ha’u iha mehi boot ida hakarak servi povu no nasaun Timor-Leste. Tanba ne’e kuandu ha’u eleita ba Prezidenti Republika períodu 2022-2027, ha’u sei servi povu no nasaun TL ho fuan no laran tomak,” Armanda Berta iha programa ‘Hili Ita-Nia Prezidente Repúblika’ iha nia rezidénsia Manleuna, Dili. 

Kandidata Prezidente Repúblika hosi Partidu KHUNTO ne’e, iha mehi boot hakarak hala’o polítika bazea ba ninia misaun prioridade sira bainhira eleita sai Prezidente Repúblika iha eleisaun prezidensiál 2022 ne’e.

“Ha’u-nia mehi ka misaun prioridade mak tane aas pás, estabilidade, seguransa no unidade nasionál,” nia dehan.

Ninia misaun ne’e iha ligasaun ho ninia lema moris nian hodi moris banati mak ‘Pasiénsia Hodi Atinje Vitoria’ nu’udar feto timor-oan ne’ebé iha interese ba povu no nasaun Timor-Leste ba mehi prioridade prinsipál mak kontribui ba dezemvolvimentu nasionál hodi hili involve an iha vida politika.

Biodata

Armanda Berta dos Santos, moris iha Dili, loron 11 fulan Outobru tinan 1974. Armanda Berta agora daudaun assume knar nu’udar Prezidente Partidu KHUNTO (Kmanek Haburas Unidade Nasional Timor Oan).

Feen-kaben hosi José dos Santos ‘Naimori’ ne’e iha tinan 1980, hahú ninia estudu iha eskola Ensinu Primaria, Ensinu Pre-Sekundaria no Ensinu Sekundariu iha Munisípio Ainaro.

Armanda Berta hasai lisensiada iha Universidade da Paz (UNPAZ) iha area Gestão no akaba estudu Mestradu iha Universidade Tecnológia Surabaya, Indonesia iha área Gestão Governativa iha tinan 2015.

Iha tinan 2011, Armanda Berta hetan konfiansa hodi assume pozisaun nu’udar deputada iha Aliansa Demokrata iha tinan 2011. Iha fali VIII Governu Konstitusional, Armanda Berta assume kargu nu’udar Ministra Solidariedade Sosia no Inkluzaun ba periode 2018-2023 no ikus liu xefe Governu fó fiar ba nia nu’udar Vise Primeira Ministra.

Reporter  : Armandina Moniz

Editór      :  Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here