Diretór Jerál STAE, Acilino Manuel Branco. Imajen TATOLI/Egas Cristóvão

DILI, 15 marsu 2022 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, informa STAE rejista eleitór 800-resin hosi prizaun tolu iha Timor-Leste hanesan prizaun Dili, Suai no Ermera, hodi partisipa iha eleisaun predensiál 2022.

“Ita rejista ona eleitór 800-resin ne’ebé oras ne’e daudaun hela iha prizaun tolu iha Timor-Leste atu sira mós bele ezerse sira-nia direitu votu iha eleisaun prezidensiál 2022,” Diretór Jeral Sekretáriadu Tékniku Administrasaun Eleitorál ne’e hateten ba Agência TATOLI iha nia knaar fatin Caicoli, Dili, tersa ne’e.   

Iha prizaun Becora rejista eleitór 509, guarda prizionál 130, rekluzu (reclusos) 379 no lista preventiva sira-ne’ebé atu partisipa eleisaun prezidensiál 2022 hamutuk 85.

STAE mós rejista eleitór 106 hosi prizaun Gleno, guarda prizionál 35, rekluzu 71 no iha rekluzu 32 ne’ebé seidauk entrega kartaun eleitorál no na’in-hitu (7) laiha kartaun eleitorál, tanba ne’e sira labele partisipa no labele ezerse sira-nia direitu votu iha loron 19 marsu 2022.

Kona-ba Prizaun Suai, STAE rejista eleitór hamutuk 149 ne’ebé kompostu hosi guarda prizionál hamutuk 37 no rekluzu 112.

STAE rejista eleitór iha territóriu nasionál inklui diáspora hamutuk 859,613 ne’ebé kompostu hosi nasionál 852,500 no diáspora hamutuk 7,119. Hosi nasaun Austrália 1,487, Korea Sul hamutuk 1,277, Irlandia do Norte 1.264, Portugal 857 no Reinu Unidu 2,234.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here