SEPS fasilita formasaun ba ONG no OPS Iha RAEOA. Imajen Tatoli/Abílio Elo Nini.

OÉ-CUSSE, 15 marsu 2022 (TATOLI) – Sekretaria Estadu Protesaun Sívil (SEPS) liuhosi Diresaun Nasionál Prevensaun Konflitu Komunitária (DNPKK), fasílita formasaun ho tema ‘Lideransa Transformativu no Igualdade Jéneru’ ba grupu feto, Organisaun Naun Governamentál (ONG) inklui Ofisiál Polísia Suku (OPS) iha Rejiaun Administrativa Espesiál Oé-Cusse Ambeno (RAEOA).

Formasaun ne’e realiza loron rua, hahú tersa 15 to’o kuarta 17 marsu, hodi introdús matéria prinsipál kona-ba igualdade jéneru no lideránsa transformativa, ne’ebé abertura hosi reprezentante Prezidente Autoridade RAEOA, atuál Sekretária Rejionál ba Asuntu Edukasaun Solidariedade Sosiál no Inkluzaun, Avelina da Costa.

“Formasaun ne’e importante atu hakbiit no promove feto sira-nia kapasidade, nune’e bele sai líder ida, iha família, sosiedade no iha serbisu fatin, nune’e hamutuk ho mane sai parseria di’ak iha desizaun ba implementasaun programa ruma ba iha serbisu hotu, hodi hamutuk ho mane-sira bele kontribui ba prosesu dezenvolvimentu iha Oé-Cusse,” Avelina da Costa, ko’alia iha serimónia abertura iha Sikluli, Oé-Cusse, tersa ne’e.

Koordenadór Diresaun Prevensaun Konflitu komunitária, Daniel Elo, hatete, objetivu atu hasa’e koñesimentu kona-ba lideransa transformativa no igualdade jéneru liuliu ba inan feto-sira.

Tán ne’e parte DNPKK, konvida paresiriu-sira foku liu ba ONG sira hanesan Psychosociál Recovery and Development in East Timor (PRADET), Asisténsia Legál ba Feto no Labarik (ALFELA), Ofisiál Polísia Suku (OPS) no Ministériu Solidariedade Sosiál Inkluzaun (MSSI).

“Tanba sira mak autor lor-loron komunika direita kona-ba problema ho oinoin hosi komunidade iha baze, entaun ita konvida-sira mai liuhosi formasaun ne’e, bele akumula hanoin hamutuk atu hadi’a mekanizmu ba futuru,” Daniel Elo informa.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here