Médiku sira iha Sentru Saude Vera-Cruz halo hela atendementu ba labarik sira ne’ebé hetan moras dengue, Kuarta 9/2/2022. Imajen Tatoli/Antonio Dasiparu

DILI, 15 marsu 2022 (TATOLI)— Tuir dadus estatístika Servisu Saúde Munisípiu Ainaro (SSMA), hahú janeiru to’o horisehik (14/03), rejista pasiente dengue hamutuk 44, hosi númeru ne’e labarik na’in-rua mak mate.

“Pasiente 44 ne’e maioria labarik, ne’ebé na’in-40 mak alta ona ba uma, na’in rua mak sei baixa hela iha sentru saúde internamentu Ainaro no na’in-rua mak lakon vida,” Diretór Servisu Saúde munisípiu Ainaro, Agostinho da Costa hateten ba Agência TATOLI iha Hotél Timor, segunda ne’e.

Resposavél ne’e dehan hahú halo intervensaun ba prevensaun surtu dengue liuhosi hala’o limpeza jerál no halo fumigasaun iha área risku sira hanesan postu Maubessi, Hatubelico, Hatudo no Ainaro-vila.

Daudaun ne’e, estoke fumigasaun no abate sufisiente hela, nune’e ekipa saúde nafatin halo sensibilizasaun informasaun ba komunidade sira liuhosi atividade SISKA ka vizita saúde iha familia.

“Kazu dengue ne’e tratamentu medikamentu laiha, maibé ita halo tratamentu tuir diagnostika ne’ebé  mediku sira fó, nune’e atu halo di’ak  ne’e  mak  halo intervensaun liuliu rega susuk hodi hamate susuk  atu labele habarak dengue,” nia akresenta.

Alende ne’e, iha fulan janeiru mai to’o agora moras ispa, diareia no pneumonia mak nafatin aas iha Munisípiu Ainaro.

Entertantu, Ministériu Saúde (MS) liuhosi Diresaun Nasionál Saúde Públika, liuliu Departamentu Vijilánsia Epidemolojia, hahú fulan-janeiru to’o horiseik  pasiente dengue sa’e ba 3.026, hosi númeru ne’e hamate ona labarik na’in-35. 

Maioria kazu ne’e deteta husi Munisípiu Dili ho totál 1.991 Baucau 125, Manatuto 159, Covalima 131, Ermera ho kazu 90, Manufahi 127, Viqueque 57, Ainaro 43, Liquiça 89, Aileu 85 no Bobonaro 40 Lautem 104 no RAEOA tolu.

Munisípiu Dili nafatin rejista kazu ne’ebe a’as iha primeira semana janeiru no desimu primeiru semana fulan fevereiru 2022, ho totál kazu 1.991. Enkuantu nonu no desimu semana kazu komesa redus.

To’o ohin loron desimu primeiru semana fulan fevereiru 2022, kazu dengue hosi postu administrativu Dom Alexo iha 1066, Cristo-Rei 389, Vera-Cruz 234 no Nain-Feto 258

Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 357, Klínika Fatumeta 235, sentru saúde Comoro 627, sentru saúde Vera-Cruz 155, sentru saúde Formoza 322, sentru saúde Becora 228, klínika Madre Eliza ida, sentru saúde Atauro 11, sentru saúde Metinaro 26, klínika Bairru-Pité 26 no klínika Motael na’in-ida no klinika moris foun ida.

Notísia relevante: Janeiru to’o marsu, dengue hamate labarik na’in-34 no pasiente 2.921

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here