Kandidatu Prezidente Repúblika, Francisco Guteres 'Lu-Olo', báinhira halo kampana iha Liquica, sesta , 4 marsu 2022. Imajen Tatoli/ Antonio Dasiparu

DILI, 15 marsu 2022 (TATOLI)—Kandidatu Prezidente Repúblika ba mandatu 2022-2027, Francisco Guterres Lú Olo, sei partisipa iha debate ne’ebé organiza hosi Comissão Nacional de Eleições (CNE) ba ohin kalan, 15 marsu 2022.

Tanba iha interese atu partisipa iha debate ne’e mak horisehik, iha 14 marsu 2022, reprezentante legál kandidatu Prezidente Repúblika Fernando Dias Gusmão partisipa iha enkontru preparativu iha Hotel El Legendario, fatin ne’ebé sei  hala’o transmisaun direta hosi GMN TV.

“Horisehik kedas kandidatu Lú Olo hetan malu ho reprezentante Fernando Dias Gusmão hodi hatene kona-ba preparativu hosi GMN no CNE kona-ba debate ne’e,” refere komunikadu imprensa ne’ebé Agência Tatoli asesu, tersa ne’e.

Biar iha protestu ba oinsá CNE organiza debate ida-ne’e, kandidatu Prezidente Repúblika ho númeru sorteiu neen (6)  hakarak uza oporunidade ohin nian hodi hato’o ninia kompromisu polítiku no hatán pergunta ne’ebé de’it  ne’ebé Komisaun Organizadora prepara tiha ona.

Ekipa Susesu kandidatu Prezidente Repúblika Francisco Guterres Lú Olo hala’o protestu hasoru CNE relasiona ho hili GMN, empreza televiziva privada, ne’ebé responsabiliza ba transmisaun direta debate kandidatu Prezidente Repúblika, tanba durante ne’e estasaun GMN la hatudu sira-nia imparsialidade no apoiu liu kandidatu ida liufali kandidatu sira seluk iha kampaña ba eleisaun Prezidente Repúblika.

Ekipa Susesu kestiona CNE nia imparsialidade hili estasaun televiziva GMN ba transmisaun direta debate Prezidente Repúblika nian, maibé ne’e la signfika kandidatu Prezidente Repúblika Francisco Guterres Lú Olo sei la partisipa iha debate ne’e.

Kandidatu Prezidente Repúblika Francisco Guterres Lú Olo sempre prontu atu hato’o nia kompromisu polítiku iha oportunidade ne’ebé de’it, atu nune’e eleitor hotu-hotu iha Timor-Leste tomak  no iha rai-li’ur  bele akompaña no hatene kandidatu ninia kompromisu polítiku ba tinan lima tuir mai.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here