Kandidatu Prezidente Repúblika períodu 2022-2027, hosi partidu CNRT, José Ramos Horta. Imajen TATOLI/Egas Cristóvão.

DILI, 14 marsu 2022 (TATOLI)–Kandidatu Prezidente Repúblika (PR) hosi partidu Congresso Nacional de Reconstrução de Timor (CNRT) ba períodu 2022-2027, ho númeru sorteiu 14, José Ramos Horta, kompromete bainhira hetan fiar hosi povu, sei serbisu hamutuk ho Governu atu aselera formasaun téknika profisionál ba joven.

“Kuandu ita hakarak aproveita didi’ak adezaun ba Asosiasaun Nasaun Sudeste Aziátiku (ASEAN, sigla inglés), tenke aselera formasaun téknika profisionál iha área siénsia no teknolojia ba ita-nia joven sira,” Kandidatu PR Horta, hato’o ninia kompromisu polítiku durante kampaña iha Tasi-tolu, tersa ne’e.

Notísia relevante: Horta hakarak koopera ho Governu no setór privadu hadi’a ekonomia

Nia konsidera, adezaun Timor-Leste ba ASEAN importante tebes, nu’udar membru ba da-11, ne’ebé hanesan asosiasaun ho ekonomia boot tebes no totál populasaun hosi nasaun membru millaun 700.

Aleinde ne’e, tuir Horta, bainhira Timor-Leste hakarak adere ba ASEAN, tenke kria relasaun metin liután ho Indonézia.

“Hanesan esforsu ne’ebé maka Maun Xanana halo ona ho Indonézia durante tinan-hitu hela iha Cipinang, nia hadomi povu Indonézia no povu Indonézia hadomi nia. Ita-nia viziñu ho jeografia no istória impoin ba ita, mundu admira prosesu, susesu no rekonsiliasaun nasionál entre Timór ho Indonézia, tanba Maun Boot Xanana ho ninia autoridade morál no polítika dada ita ba rekonsiliasaun,” nia tenik.

Kampaña ikus Kandidatu PR Horta la’o ho hakmatek, ne’ebé hetan partisipasaun másima hosi simpatizante no militante hosi partidu CNRT, Frente Mudansa, inklui organizasaun no grupu arte marsiál no ritual balun.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here