Ai-sunu ne'ebé MAP Baucau liuhosi diresaun reflorestrál halo apreensaun iha área estrada Vemase. Imajen espesiál.

BAUCAU, 15 marsu 2022 (TATOLI) – Servisu Agrikultura no Peska Munisípiu Baucau liuhosi Diresaun Reflorestrál, Plantasaun no Industriál iha tinan 2022 halo aprensaun ai-sunu hamutuk kamioneta rua hosi komunidade iha área estrada diresaun postu administrativu Vemasse.

Koordenadór Reprezentasaun Territoriál Reflorestál, Plantasaun no Indústria Munisípiu Baucau, Pasqual Afonso Belo, hateten, razaun halo apreensaun ba ai hirak-ne’e tanba komunidade sira  tesi-ai arbiru iha mota no rai-lolon no laiha dokumentu legál.

“Komunidade sira mesak tesi arbiru iha bee matan, rai-lolon tanba ne’e floresta iha direitu halo intervensaun, sé lae futuru mai sai preokupasaun ba Baucau,” Pasqual Afonso Belo hateten iha Vila Nova, tersa ne’e.

Prosesu apreensaun ne’e bazea ba Dekretu-lei númeru 14/2017 kona-ba rejime jerál labele tesi ai no sunu ai arbiru no ezekuta regulamentu UNTAET nian númeru 17 ne’ebe bandu ema atu tesi no sunu ai arbiru.

Hosi ai kamioneta rua ne’e, kamioneta ida livre ona hosi prosesu tribunál, enkuantu hela kamioneta ida mak daudaun ne’e prosesa hela iha Ministériu Públiku hodi kontinuasaun ba tribunál.

Pasqual esplika, bainhira komunidade atu tesi ai ho volume barak tenke tuir prosesu legál  no prienxe kritéria tesi ai nian hanesan iha lisensa sosiál katak tesi ai hodi utiliza ba nesesidade privadu no lisensa komerisiál tenke kontribui taxa ba estadu.

“Ami monta guarda floresta sira tuir dalan bainhira laiha dokumentu entaun direitamente halo kedas apreensaun,” Pasqual argumenta.

Diresaun reflorestrál rasik iha koordensaun ho Polísia Nasionál Timor-Leste (PNTL) no sei prosesu ba Ministeiru Publiku (MP) bainhira iha indisiu krime sei submete ba tribunál.

Evidénsia sira sei entrega ba diresaun nasionál no patriomóniu estadu atu deside leilaun hanesan konstribusaun ba retornu estadu.

Entretantu, tótal guarda florestrál Baucau dadaun ne’e na’in-hitu ne’ebé destaka ba postu administrativu neen no tuir planu sei rekruta tán na’in-13 iha fulan-abríl hodi reforsa serbisu iha terrenu.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here