Padre José Alves Martins. Imajen/Espesiál

DILI, 15 marsu 2022 (TATOLI)–Governu Timor-Leste hato’o votu pezar ba falesimentu Padre José Alves Martins, ne’ebé hakotu iis iha loron 14 marsu 2022, iha Ospitál Vila Franka Xira, iha Portugal.

Governu espresa sentimentu kle’an bainhira simu notísia kona-ba misionáriu jezuita nia mate.

“Hanesan momentu triste ne’ebé kle’an ba relijiozu no povu timor-oan tomak ein jerál, tanba ne’e lori Konsellu Ministru no Povu tomak nia naran, hato’o sentida kondolénsia ba família estimadu Padre José Martins, ba Igreja no ba família jezuita Timor-Leste nian,” Portavós Governu no Ministru Prezidénsia Konsellu Ministru, Fidelis Manuel Leite Magalhães, hateten, liuhosi nota ne’ebé Agência TATOLI asesu, tersa ne’e.

Misionáriu hosi Companhia de Jesus ho idade 80, tinan barak hela iha Timor-Leste to’o tinan 33 no nunka sai hosi país ne’e durante okupasaun indonézia, nia mós sempre apoia populasaun no rezisténsia.

Padre José Alves Martins moris iha loron 17 jullu 1941, iha São Romão de Neiva, Viana do Castelo, Portugal.

Iha loron 07 setembru 1958, Padre José Alves tama ba Companhia de Jesus iha Noviciado de Soutelo, iha Braga. Iha tinan 1969, nia ramata ninia Teolojia ba tinan dahuluk, iha Universidade Katólika, Lisboa.

Hosi tinan 1970 to’o 1974, nia estuda no hasai lisensiatura iha Teolojia Espirituál iha Universidade Gregoriana, Roma. Iha loron 09 jullu 1972 simu ordenasaun Saserdotál, iha Apúlia, Esposende, Braga.

Nia to’o mai Timor-Leste iha loron 23 setembru 1974 no hahú sai profesór no Diretór espirituál iha Semináriu Diosezanu, Dili.

Iha loron 07 dezembru 1975 nia halai sai ho kanek kma’an tanba Semináriu hetan bombardeiu hosi militár indonézia. Iha tinan 1978, nia loke hikas Semináriu iha aredór Dili nian, ne’ebé nia asume knaar hanesan Reitór Semináriu, hosi tinan 1985 to’o 1991 no ezerse kargu oin-oin iha nível diosezanu no dirije Casa de Exercícios Dare.

Iha tinan 2000, nia nomeadu hanesan Superiór rezidénsia Loiola, iha Taibesi no sai hanesan Konselleiru Bispu Dili.

Aleinde ne’e, nia sai mós hanesan Koordenadór ba formasaun permanente Kleru no Prezidente Santa Casa da Misericórdia.

Iha loron 09 juñu 2004, nia hetan kondekorasaun ho Grau komendadór Orden Méritu Portugal hosi Prezidente Jorge Sampaio.

Iha maiu 2012, nia hetan kondekorasaun ho medalla Orden Dom Martinho Lopes, tanba ninia apoiu ba rezisténsia timor-oan no kontributu ne’ebé signifikante tebes ba luta ukun-rasik an no iha loron 11 maiu 2016, hetan kondekorasaun ho Medalla Méritu nasionál nian.

Iha loron 27 marsu 2019, Papa Francisco atribui medalla Pro Ecclesia et Pontifica hodi rekoñese ninia asaun apostólika iha Timor.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here