Reprezentante parte Legál hosi kandidatu Lú OLo, Fernando Gusmão, no Pedrito Vieira hosi ekipa susesu kandidatu Virgili Guterres hala’o konferénsia imprensa konjunta. Imajen Tatoli/Nelson de Sousa.

DILI, 15 marsu 2022 (TATOLI)—Ekipa susesu hosi kandidatu Prezidente Repúblika períodu 2022-2027 ho númeru sorteiu 6, Francisco Guterres ‘Lú Olo’ no kandidatu ho númeru sorteiu 12, Virgílio da Silva Guterres ‘Lamukan’ apela ba apoiante sira atu nafatin dixiplina, kria pás no estabilidade iha kampaña ikus ne’ebé sei hala’o iha Dili, kuarta (16/03) ne’e.

“Aban kandidatu na’in-rua ne’e sei konklui sira-nia kampaña iha Dili, nune’e ekipa susesu hosi kandidatu na’in-rua ne’e husu ba militante no simpatizante  atu kumpre nafatin regra tránzitu nian, labele halo provokasaun iha dalan sai hosi uma ba fatin ne’ebé halibur malu ba to’o iha fatin kampaña ho hakmatek no dixiplina nafatin,” Reprezentante parte Legál hosi kandidatu Lú OLo, Fernando Gusmão, hateten liu hosi komferénsia imprensa konjunta  ne’ebé hala’o hosi ekipa susesu rua ne’ebé akompaña hosi Pedrito Vieira, iha restaurante Pro Ema, Bidau, tersa ne’e.

Tanba ne’e, nia husu rona orientasaun hosi ekipa susesu ka koordenadór sira no rona orientasaun hosi autoridade seguransa PNTL, nune’e taka kampaña ho di’ak hakmatek hodi hein iha loron 19 marsu hakat ba sentru votasaun hodi partisipa eleisaun.

Lamenta desizaun CNE hili empreza privada realiza debate

Iha komferénsia konjunta ne’e ekipa susesu rua kontinua hato’o preokupasaun planu debate entre kandidatu sira-ne’ebé mak sei hala’o iha tersa (15.0-3) kalan ne’e, ne’ebé CNE kontinua deside GMNTV mak sai na’in ba debate públiku entre kandidatu Prezidente Repúblika 2022-2027.

“Ekipa susesu kandidatu rua, ami seida’uk simu esplikasaun ne’ebé hosi CNE hato’o ona tanba invoka de’it ba pontu ida mak kona-ba kustu ba debate nian maibé ida-ne’e esplikasaun seidauk klaru tanba ba aspeitu saida-saida la esplika,” Fernando Gusmão lamenta.

Ekipa kandidatu rua hakarak foka ba asuntu seluk ne’ebé importante duké kustu mak direitu povu nian atu hetan informasaun hotu liu-liu programa kompromisu polítiku hosi kandidatu sira iha eleisaun prezidensiál 2022.

Haree mós katak devér mídia públiku nian atu hatutan informasaun ne’ebé imparsiál no kredivel ba povu tomak no foka ba área kobertura katak povu hotu iha direitu atu asesu informasaun oinsá bele kobre ba iha territóriu tomak, nune’e povu ne’ebé iha área rurál bele asesu debate.

Mezmu ho lamentasaun sira-ne’e, ekipa susesu parte rua afirma katak kandidatu PR na’in-rua ne’e nafatin tuir debate ne’ebé sei hala’o iha tersa kalan ne’e.

Pedrito Viera hateten, iha loron hirak liu ba kandidatu sira-nia halo protesta makaas katak tanbasá CNE la uza RTTL, E.P ne’ebé Estadu rasik sai responsavél hodi investe maibé hili fali empreza privadu, ida-ne’e desizaun CNE ladún di’ak.

Tuir kalendáriu hosi órgaun eleitorál kandidatu PR Francisco Guterres Lú Olo, iha kuarta (16 marsu 2022) sei hala’o kampaña ho tipu komisíu iha Tasi-Tolu Dili, tuku 14h00 to’o 18h30 no  kandidatu Virgílio Lamukan sei hala’o kampaña ho tipu diálogu iha kampu futebol Becora, Dili iha tuku 15h00 to’o 18h00

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here