Apoiante kandidatu Prezidente Repúblika, Francisco Guterres ‘Lú Olo’ bainira atu tuir kampaña iha Darsula, suku Gariuai, postu administrativu Baucau Vila. Imajen Tatoli/Natalino Belo.

BAUCAU, 15 marsu 2022 (TATOLI) –  Ekipa susesu kandidatu Prezidente Repúblika, Francisco Guterres Lú Olo, hato’o keixa ba Polísia Nasionál Timor-Leste (PNTL) atu identifika insidente rezulta apoiante kanek hafoin kampaña iha loron 12 fulan-marsu.

Koordenadór Ekipa Susesu Kandidatu Prezidente Repúblika, Francisco Guterres ‘Lú Olo’ Munisípiu Baucau, Francelino Ximenes, hateten, bainhira kampaña remata, apoiante sira fila ba postu administrativu, tuir dalan mosu atake hosi grupu deskoñesidu hein iha dalan hodi tuda no hakanek apoiante.

“Ekipa susesu kandidatu Prezidente Repúblika Francisco Guterres ‘Lú Olo’ aprezenta ona keixa ba Komandu PNTL munisípiu Baucau hodi hahú prosesu investigasaun,” Francelino Ximenes informa liuhosi komunikadu imprensa ne’ebé Agênsia TATOLI asesu, tersa ne’e.

Apoioante na’in-ida hosi postu administrativu Baguia naran Lorenco Rodrigues hetan tá iha área Wainiki, suku Bahú, postu administrativu Baucau Vila.

Aliende ne’e, apoiante hetan atake iha suku Samalari no suku Atelari, postu administrativu Laga, hodi rezulta apoiante na’in-lima kanek ne’ebé vitíma sira hosi sku Larisula, Haeconi no Osso Huna, postu administrativu Baguia.

Nune’e mós hakanek apoiantes sira balun hetan provokasaun iha suku Triloka no suku Garuwai, postu administrativu Baucau Vila no área Waibehe-Ana, postu Venilale maibé la rezulta ema ruma mak vítima.

Entretantu, kampaña kandidatura Prezidente Repúblika númeru sorteiu 56 ne’e iha Baucau, ekipa sussesu mobiliza apoiante hosi postu administrativu neen hanesan Baucau Vila, Venilale, Quelicai, Laga, Vemasse no Baguia, ho totál ema rihun 20, karreta kamioneta 259 no motorizada 1.811.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here