Diretór CNE RAEOA, Tomás Oqui Meta. Imajen Tatoli/Abílio Elo Nini.

OÉ-CUSSE, 15 marsu 2022 (TATOLI) – Komisaun Nasionál Eleisaun (CNE, sigla portugés) aprova kalendáriu ba kandidatu Prezidente Repúblika períodu 2022-2027 na’in-lima bele realiza mini kampaña eleitorál iha Rejiaun Administrativa Espesiál Oé-Cusse Ambeno (RAEOA).

Diretór CNE RAEOA, Tomás Oqui Meta, informa, kandidatu na’in-lima ne’ebé daudaun ne’e nafatin realiza mini kampaña iha Oé-Cusse, mak hanesan, kandidatu Prezidente Repúblika Fransisco Guteres ‘Lu-Olo’, José Ramos Horta, Armanda Berta do Santos, Lere Anan Timur no Mariano Assanami Sabino.

“Antes ne’e loron-lima tuir lei haruka, kandidatu sira mai hatama pedidu no kalendáriu iha CNE atu hetan aprovasaun mak foin bele realiza mini kampaña, karik iha mudansa, sira mós informa kedas mai CNE ho seguransa, nune’e ita bele halo monitorizasaun no hetan seguransa,” Tomás Oqui Meta, informa ba Agência Tatoli iha Sikluli, Oé-Cusse, tersa ne’e.

Nia dehan, iha mini kampaña tenke bazea regulamentu ne’ebé órgaun eleitorál fó-sai ona, katak hotu-hotu sei ensera iha loron 16 marsu tanba loron silénsiu hahú hosi loron 17 to’o 18, atu tempu ba eleitór sira hodi deside molok ezersísiu direitu votu iha loron loron eleisaun prezidensiál 19 marsu.

“Tanba ne’e, sira-nia atividade mini kampaña ne’e, ami hosi CNE mós halo observasaun hamutuk ho observadór internasionál no hetan seguransa hosi PNTL, ami nafatin tau matan ba sira, tanba atividade ne’e mós fas parte hosi kampaña eleitorál,” nia katak.

Nune’e nu’udar responsável órgaun eleitorál iha RAEOA, nia apela nafatin ba kandidatu-sira, atu bele kumpri loron rua nia laran, tanba hahú loron 17 to’o 18, sei laiha autorizasaun ba kandidatu se-de’it atu halo halo barullu mobilizasaun masa iha loron silénsiu, tanba loron rua ne’e fó espasu ba eleitór sira atu hakmatek hodi deside atu ezerse sira-nia direitu votu iha loron 19 marsu sabadu ne’e.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here