Prezidente PD, Mariano Assanami Sabino. Imajen/Egas Cristovão

DILI, 15 marsu 2022 (TATOLI) – Kandidatu Prezidente Repúblika, Mariano Assanami Sabino Lopes, hatete bainhira povu fó fiar sai Xefe Estadu mak sei propoin ba Ezekutivu hodi promove lian haat iha órgaun komunikasaun sosiál hotu.

“Ha’u sei serbisu ho Governu no universidade ou presiza instituisaun permanente sira hodi hasa’e kapasidade média, liuliu ba jornalista hothotu para eleva sira koñesimentu iha hakerek, tenke domina área linguístika – inglés, portugés, indonézia no tétun”, realsa kandidatura ho númeru sorteiu 16.

Nia promete katak sei garante liberdade espresaun ba povu liuhusi órgaun komunikasaun sosiál hodi promove demokrasia.

Tuir nia, presiza apoiu no hasa’e kapasidade ein termu materiál ba RTTL, Agência Tatoli, I.P no média sira seluk atu assegura serbisu jornalizmu hodi promove liberdade imprensa liuhusi informasaun.

Assanami esplika katak presiza garante liberdade imprensa hodi kombate informasaun falsa sira ne’ebé espalla iha rede sosiál. Promove liután informasaun iha setór edukasaun no saúde nian hodi fó espasu ba ema atu diskute no analiza.

“Tempu ona sai sosiedade dijitál. Nu’udar prezidente, ha’u sei luta maka’as hodi assegura katak kabu submarinu tenke mai, fibra ótika tenke la’o para hatún folin [internét]”, tenik nia.

Kandidatu ne’e hatutan presiza promove liután kursu iha lian haat refere ho gratuita tanba jornalista presiza hatene lian sira ne’e.

Jornalista: Isaura Lemos de Deus

Editora: Maria Auxiliadora

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here