Diretór STAE Covalima, Francisco Gusmão. Imajen Tatoli/Celestina Teles.

COVALIMA, 14 marsu 2022, (TATOLI)—Sekretariadu Tékniku Administrasaun Eleitorál (STAE) Covalima sei estabele votasaun movel iha prizaun no ospitál referál munisípiu Covalima, nune’e pasiente ne’ebé moras no prizioneiru sira bele ezerse sira-nia direitu votu iha eleisaun prezidensiál 2022.

“Ita sei estabelese sentru votasaun movél mak iha prizaun ba prezu sira no iha ospitál referál munisípiu Covalima ba pasiente sira-ne’ebé moras no família na’in-ida ne’ebé akompañia pasiente moras iha óspitál,” Diretór STAE Covalima, Francisco Gusmão, hateten ba Agência Tatoli, iha nia knar fatin, Kampung Baru, Covalima, segunda ne’e.

Kritéria ba sidadaun sira-ne’ebé iha ospitál referál Covalima atu tuir votasaun iha loron 19 fulan marsu ne’e mak sidadaun lori kartaun eleitorál no mós sidadaun ne’ebé akompaña pasiente na’in-ida no médiku sira-ne’ebé hala’o servisu iha loron votasaun ne’e.

Bazea ba dadus ne’ebé mak STAE simu hosi ospitál Referál Covalima katak, sidadaun ne’ebé moras hamutuk ho nia akompañamentu na’in-27, maibé dadus médiku liu pasiente atu tuir vota nia la dekór númeru ne’ebé serteza.

“STAE sei estabelese sentru votasaun movel iha ospitál referál Covalima,” nia dehan.

Aleinde estabelese sentru votasaun movel iha ospitál referál Covalima, STAE mós estabele sentru votasaun movel ba prezu sira-ne’ebé mak iha prizaun Covalima hodi bele ezerse sira-nia direitu votu iha loron 19 fulan-marsu ne’e.

Bazea ba dadus hosi diretór prizaun Covalima, Julio Dias Ximenes, haktuir prezu iha munisípiu Covalima hamutuk 111 no hosi númeru ne’e prezu prizaun kondenadu na’in-82 no prezu prizaun preventiva 29.

Enkuantu, atu realiza festa demokrasia iha loron 19 fulan marsu ne’e, oras ne’e daudaun brigada  STAE no ofisiál Komisaun Nasionál Eleisaun (CNE-Sigla portugés) halo hela verifikasaun ba buletin votu, molok distrbui ba iha sentru votasaun iha postu administrativu sira-ne’ebé pertense ba munisípiu Covalima.

Dadus hosi STAE haktuir, eleitór ne’ebé  atu ezerse nia direitu iha loron 19 fulan-marsu ne’e hamutuk 47,807 ne’ebé kompostu hosi mane 2,4446 no feto 2,3361, ho sentru votasaun iha munisípiu Covalima hamutuk 80 no estasaun votasaun 92.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here