Pasaporte Repúblika Demokratika Timor-Leste (RDTL). Imajen/Espesiál

DILI, 14 marsu 2022 (TATOLI)—Prezidente Komisaun G ne’ebé trata asuntu Edukasaun, António Verdiál, husu Govenu liuhosi ministéiru relevante atu solusiona estudante timor-oan sira iha diáspora ne’ebé pasaporte kaduka ona.

“Ministériu Ensinu Superiór Siensia no Kultura (MESSK) atu servisu hamutuk ho Ministériu  Justisa (MJ) no Ministériu  Negósiu  Estranjeiru (MNEK) atu foti desizaun ho urjente ba estudante timor-oan sira iha diáspora  ne’ebé sira-nia pasaporte kaduka ka mate ona,” Deputadu António Verdiál levanta liuhosi reuniaun plenária, segunda ne’e.

Tanba, nia dehan, iha estudante timoroan balun mak hetan ona ameasa atu deporta fila mai Timor-Leste, no iha estudante barak mak hetan bolsa estudu hosi embaixada sira hanesan Vietname, Nova Zelandia, Portugal, Brazil no selu-seluk tan.

Tuir nia, estudante hirak ne’e presiza atu bele renova sira-nia pasaporte hodi bele hala’o sira-nia estudu iha rai-li’ur ho seguru.

Vise Segundu Prezidente Parlamentu Nasionál, Luis Roberto, hateten iha estudante timor-oan na’in 10-resin ne’ebé iha situasaun COVID-19 mai Timor-Leste atu fila-fali maibé laiha dalan ba sira, tanba ne’e foin daudauk hato’o ona ba parte ministériu edukasaun atu tau matan maibé seidauk iha rezultadu.

Hatán ba kestaun ne’e, reprezenta Governu liuhosi Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, klarifika kona-ba estudante timor-oan hosi Filipina no Malázia ne’ebé hasoru problema hanesan mós ho sira-nia passaporte, ne’ebé foin simu informasaun hosi MESSK katak ministéiru haruka ona karta pedidu ba Ministéiru Negósiu Estranjeiru no Kooperasaun (MNEK) no Ministéiru Justisa.

“Karta ba ona no daudaun ne’e iha prosesu nia laran no tempu badak sei solusiona,” nia dehan.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here