Deputado Bankada KHUNTO, António Verdial de Sousa. Imajen TATOLI/Egas Cristóvão

DILI, 14 marsu 2022 (TATOLI)—Vise Xefe Bankada KHUNTO iha Parlamentu Nasionál, António Verdial de Sousa, kongratula povu nia maturidade kria pás no estabilidade iha kampaña eleitorál ne’ebé kandidatu Prezidente Repúblika na’in-16 hala’o iha territóriu nasionál. 

“Bankada KHUNTO kongratula povu iha territóriu laran tomak ba sira-nia maturidade no dixiplina ne’ebé hatudu iha kampaña prezidensiál períodu 2022 durante ne’e,” Vise Bankada KHUNTO ne’e hateten liuhosi deklarsaun polítika iha plenária Parlamentu Nasionál, segunda ne’e.

Povu hatudu sira-nia dixiplina durante kampaña eleitorál ne’ebé kandidatu Prezidente Repúblika na’in-16 hala’o hahú hosi loron 02-16 marsu ne’e, hatudu katak povu matenek iha maturidade no dixiplina mezmu iha mós konfitu ida-rua mosu durante kampaña ne’e hala’o.

Nasaun demokrásia no povu hatudu duni katak sira moris iha demokrásia nia laran, hodi partisipa maximu iha kampaña eleitorál ba kandidatu 16, hodi rona kandidatu ida-idak nia vizaun bainhira sai hanesan Prezidente Repúblika ba tinan lima mai.

Aleinde ne’e, bankada KHUNTO kongratula kandidatu Prezidente Repúblika períodu 2022-2027 hamutuk na’in-16 ne’ebé iha períodu hala’o kampaña ne’e hatudu mós sira-nia maturidade polítika hodi hato’o sira-nia programa no kompromisu ho loloos.

“Falta de’it loron rua hodi termina ita-nia kampaña ba elisaun prezidensiál ba periódu 2022-2027. Nu’udar reprezentante povu iha uma fukun hakarak kongratula ba kandidatu 16 ne’ebé iha loron kampaña hatudu tebes sira-nia maturidade polítika hodi hato’o sira-nia kompromisu eleitorál, vizaun, misaun no mensajen ba ita-nia povu atu iha tempu eleisaun ne,e povu bele hili sira,” nia dehan.

Entertantu, tuir kalendáriu hosi órgaun eleitorál hatudu katak kampaña eleitorál ba eleisaun prezidensiál 2022 ne’e, hahú realiza iha 02 marsu no ramata iha loron16 marsu, no eleisaun prezidensiál ne’e sei realiza iha 19 marsu 2022.

Husu PNTL prosesa suspeitu tuir lei

Entretantu, Segundu Vise Prezidente Parlamentu Nasionál, Luis Roberto, hateten kampaña ne’ebé kandidatu Prezidente Repúblika ho númeru sortie 9, Armanda Berta dos Santos, hala’o iha munisípiu Baucau iha loron 06 marsu ne’e, apoiante sira fila hetan atake hosi grupu balun, ne’ebé rezulta balun kanek todan no kmaan.

“Maibé, daudaun autoridade seguransa kaptura ona suspeitu balun tanba ne’e ami nafatin husu prosesa tuir lei ne’ebé iha hodi hatán ba justisa,” nia hateten.

Deputadu hosi bankada KHUNTO ne’e la duun matak ba apoiante hosi kandidatu PR sira seluk maibé ema balun mak hakarak kria instabilidade, nune’e submete investigasaun hodi hatán ba lei.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here