Primeiru-Ministru, Taur Matan Ruak, konvoka enkontru ho Prezidente ANAPROFIKO-TL, Elídio Mendonça no ekipa, iha Rezidensia Ofisiál Farol, segunda (14/03). Imajen TATOLI/Francisco Sony

DILI, 14 marsu 2022 (TATOLI)–Prezidente Asosiasaun Nasionál Produtór Fini Komersiál Timor-Leste (ANAPROFIKO-TL), Elídio Mendonça, informa, Governu liuhosi Ministériu Agrikultór no Peska (MAP) sosa ona fini hare no batar hosi asosiasaun ne’e hamutuk tonelada 300.

“Fini hirak ne’e hodi distribui filafali ba povu agrikultór, MAP sosa fini depende ba nesesidade povu agrikultór. Desde tinan 2017, ANAPROFIKO-TL serbisu hamutuk ho MAP iha setór agrikultura,” Prezidente asosiasaun hateten hafoin hasoru malu ho Primeiru-Ministru, Taur Matan Ruak, iha Rezidénsia Farol, segunda ne’e.

Notísia relevante: Sentru produsaun fini Triloka prepara hare tonelada hitu

Iha hasoru malu ne’e, Responsável asosiasaun informa ezisténsia asosiasaun ba Xefe Governu no husu apoiu liga ho sede nasionál asosiasaun, ne’ebé to’o agora sei aluga de’it.

ho Prezidente ANAPROFIKO-TL, Elídio Mendonça. Imajen TATOLI/Francisco Sony

“Informa ba Primeiru-Ministru kona-ba serbisu asosiasaun nian, ne’ebé espesífiku liu kona-ba fini hanesan batar, hare, foremungu, forerai, forekeli, aifarina, no fehuk sira ne’e iha ita-nia rain. Fini hanesan sustentabilidade seguransa ai-han iha ita-nia rain, tanba ne’e maka hato’o ba Primeiru-Ministru kona-ba kooperasaun di’ak, hodi influénsia joven sira hamutuk ho Governu atubele dudu setór ekonomia iha ita-nia ekonomia iha rai-laran,” nia akresenta.

ANAPROFIKO-TL estabelese iha tinan 2015, ne’ebé daudaun ninia ramu iha hotu territóriu nasionál.

Asosiasaun nia ezisténsia mai ho objetivu atu hapara fini esportasaun, tanba desde tinan 2015, Governu sosa fini ho kuantidade boot hosi rai-li’ur, maibé ho ezisténsia asosiasaun nian, bele redús ona fini importasaun.

“Primeiru-Ministru kongratula asosiasaun tanba ekipa sira serbisu voluntáriamente no iha rezultadu di’ak, aleinde ne’e sempre kolabora ho Governu. Tanba ne’e ami hato’o rezultadu ba Governu,” nia haktuir.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here