Kandidatu Prezidente Repúblika períodu 2022-2027. Imajen/Espesiál.

DILI, 14 marsu 2022 (TATOLI)—Vise Prezidente Komisaun Nasionál Eleisaun (CNE, sigla portugés), Domingos Barreto, informa CNE realiza debate públiku ba kandidatu Prezidente Repúbliha períodu 2022-2027 iha tempu kalan ne’e la viola lei kampaña no propaganda eleitorál no la viola mós ema seluk nia direitu.

Debate públiku ba kandidatu Pezidente Repúblika (PR) na’in-16 ne’e sei realiza iha tersa (15/03) tuku 20h00-24h30 kalan, iha Hotel Novo Turismo no GMNTV sei halo transmisaun direta, nune’e povu Timor-Leste tomak bele partisipa.

Notísia Relevante: GMN TV sei halo transmisaun direta ba debate kandidatu PR 2022-2027

“Ita la viola regra ruma liga ho lei no ami mós la viola ema nia direitu, tanba iha debate ne’e sé mak hakarak partisipa bele partisipa de’it tanba debate públiku ne’e hala’o dala ida iha tinan lima dala ida,” Vise Prezidente Komisaun Nasionál Eleisaun (CNE, sigla portugés), Domingos Barreto, informa ba Agência Tatoli, liuhosi telefónika, segunda ne’e.

Debate ne’e la viola lei kampaña no propaganda eleitorál, nia dehan, tanba antes atu realiza debate ne’e CNE mós konfirma ba kandidatu PR sira hafoin deside hamutuk hodi realiza debate ne’e iha tempu kalan.

Prezidente Komisaun Nasionál Eleisaun (CNE-sigla portugés), José Agostinho da Costa Belo, hateten debate públiku ba kandidatu Pezidente Repúblika (PR) sira hala’o iha tempu kalan atu nune’e povu tomak bele partisipa, no iha tempu dadeersan ne’e sei fó tempu ba kandidatu sira halo kampaña.  

“Ida-ne’e regra ida hodi fó tempu ba sira tanba dadeer sira halo kampaña, nune’e kalan mak ita bele halo debate tanba momentu kampaña ne’e ita-nia populasuan barak mak la partisipa tanba halao atividade agrikultura nian. Entaun, ita deside debate kalan para populasaun sira mós bele partisipa no rona kandidatu sira-nia programa. Kandidatu sira sei espresa sira-nia hanoin, nune’e povu bainhira ba vota karik vota ho rasionál,” Prezidente CNE, hateten liuhosi koferénsia imprensa iha salaun sentru mídia CNE Colmera, Dili, segunda ne’e.

CNE prepara fatin ba kandidatu sira atu hala’o debate durante oras haat nia-laran, tanba CNE atu atu promove no trata hanesan ba kandidatu PR hotu-hotu atu haklaken sira-nia prograa no kompromisu polítika.

Nia dehan, hakarak sai Prezidente Repúblika no servi rai ida-ne’e mak tenke marka prezensa hodi halo debate públiku, hodi hato’o programa ba públiku no kandidatu ne’ebé iha kapasidade no matenek sei sai Prezidente Repúblika no sei tuur iha Palásiu Prezidensiál Nicolau Lobato, Bairru Pite, Dili.

Iha debate ne’e, nia dehan, Televizaun Grupu Mídia Nasionál (GMN TV) mak sei halo transmisaun direta tanba sira hatama sira-nia kuotasaun no iha kuotasaun ne’e husu rihun $12 no kompletu ho ekipamentu sira.

Notísia Relevante: Debate kandidatu Prezidente Repúblika 2022-2027 sei realiza iha 15 marsu

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here