Komandante PNTL Baucau Superintendente António de Sá. Imajen TATOLI/Natalino Belo

BAUCAU, 13 marsu 2022 (TATOLI)— Komandu Polisia Nasionál Timor-Leste (PNTL) munisípiu Baucau, fó ona instrusaun ba membru sira atu foti medida rigorozu indivíduu ka sidadaun sira ne’ebé iha intensaun atu hamosu krime durante périodu kampaña eleitorál Prezidensiál.

Komandante PNTL Baucau, Superintendente António de Sá, hateten liuhosi asina paktu seguransa ho koordenadór ekipa susesu sira hodi hamosu akordu katak seguransa internál sei responsabiliza hosi xefe seguransa partidu tuir mekanizmu internál.

Notísia relevante:  Kazu Darsula, PNTL Baucau detein ona suspeitu nain-tolu

Maibé, nia dehan parte koordenadór sira laiha kapasidade atu kontrola situasaun tantu hahú hosi mobilizasaun masa inklui durante realiza kampaña no laiha kolaborasaun diak ho autoridade PNTL ne’ebé responsavel seguransa externalmente.

“Medida seguransa ba oin rigór liután, ita la tolera ona, hanesan komandante munisípiu ha’u prontu simu-nia konsenkuénsia tanba Timor ita labele domina ho krime, nasaun ne’e iha lei atu kontrola, entaun ema hotu-hotu iha lei nia okos,” Komandante PNTL Baucau, hateten  ba Agência TATOLI iha Vila-Nova, domingu ne’e.

Durante ne’e, medida prevensaun hanesan komunikasaun, koordenasaun no kolaborasaun entre PNTL ho ekipa susesu sira la efetivu tanba lahatudu boa vontade atu kolabora ho autoridade seguransa.

António de Sá hateten, kualker aktu krime ne’ebé akontese PNTL muda metodu prevensaun ba eskalaun katak sei uza forsa hasoru sidadaun sira ne’ebé iha intensaun hamosu insidente ka krime iha kampaña eleitorál

PNTL Baucau nafatin husu ba koordenadór ekipa susesu nain-16 atu kontinua koopera, koordena no kolabora ho autoridade seguransa nune’e garantes paz no estabilidade iha rejional Baucau durante peridu kampaña elisaun prezidensiál.

“Bainhira la kolabora parte PNTL munisípiu sei aprezenta ba ministéiru públiku para konstitui ba krime dezobedensia artigu 242 tanba ekipa susesu sira lakohi kolabora atu entrega autór ka ninia ema sira ne’ebé komete iha krime,” Komandante António akresenta.

Molok ne’e, mosu kazu konfrontu entre militante partidu rua hanesan Frente Revolucionário Timor-Leste Independente (FRETILIN) no Kmanek Haburas Unidade Timor-Oan (KHUNTO) iha loron domingu (06/03), PNTL liuhosi enkontru ho koordenadór ekipa susesu hamosu akordu atu responsabiliza ba sasan sira ne’ebé hetan estragu no entrega militante sira ne’ebé mak envolve iha konfrontu ne’e.

Komandu Jerál PNTL rasik hetan ona despaxu hosi Kuartál Jerál atu FALINTIL-Forsa Defeza Timor-Leste (F-FDTL) reforsa tan seguransa durante períodu kampaña no eleisaun prezidensiál,  nune’e forsa rua sei kolabora hamutuk atu mantein pás no estabilidade iha territóriu nasionál liuliu munisípiu Baucau.

Notísia relevante: Komandu PNTL Baucau halo ona investigasaun ba kazu konfrontu Darsula

Jornalista     : Natalino Belo

Editór           : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here