Suspeitu nain-tolu relasiona ho kazu konfrontu iha Darsula detein ona iha sela komando PNTL Baucau, Dumingu (13/03). Imajen: Agénsia TATOLI/Natalino Belo

BAUCAU, 13 marsu 2022 (TATOLI)— Komandu Polisia Nasíonál Timor-Leste (PNTL) munisípiu Baucau,  halo ona deteinsaun ba suspeitu na’in-tolu ne’ebé deskonfia sai autór prinsipál ba konfrontu hodi  hamate João Hornai, ho idade 21 iha Darsula, suku Gariuai, postu administrativu Baucau villa, munisípiu Baucau.

Komandante munisípiu Baucau, Superintendente Xefe Polísia António de Sá, informa suspeitu nain-tolu refere ho inisiál hanesan DC, mane ho idade 24, kazadu, JFX, mane, idade 21, klosan, CJF idade 26, klosan, ne’ebé konsege kaptura, ohin domingu (12/03), nune’e daudaun ne’e detein ona iha sela hodi hein prosesu kontinuasaun.

“Suspeitu hodi kalan ita kaptura kedas no ohin submete ba investigaun no agora daudaun iha sela hodi hein aprezentasaun ba Ministéiru Publiku,” Komandante PNTL Baucau hateten iha Vila-Nova-Bauca, domingu

Konfrontu ne’e akontese, la’ós kampaña aberta Kandidatu Prezidente Repúblika (PR) hosi partidu FRETILIN, ho númeru sorteiu 06, Francisco Guterres ‘Lú Olo’, maibé tanba kazu membru grupu arte marsiál (GAM).

“Kazu refere akontese iha loron Sábadu (12/03), purvolta oras 14:00-resin mosu asaltu derepente utiliza atributu partidu,  maibé maioria mesak membru Grupu Arte Marsiál (GAM) ne’ebé deskonfia organizadu,  antes hahú kampaña kandidatura Prezidente Repúblika númeru sorteiu 6 Francisco Guterres Lú-Olo ne’ebé halao iha aldeia Darsula, Suku Gariuai postu admistrativu Baucau vila,” Komandante ne’e akresenta.

Matebian João Hornai (21), hosi aldeia Luidua, suku Buibau hakotu is iha fatin akontesementu tanba hetan pankada maka’as no transporta ona ba Hospitál Nasionál Guido Valadares (HNGV) hodi kontinua halo autópsia.

Superintendente Polisia António dehan, vítima no suspeitu sira iha ligasaun família, maibé diferente Arte Marsiál tanba problema anterior, nune’e aproveita kampaña hodi hamosu konfrontu hodi rezulta vitima hakotu iis.

“Sira mesak suku ida de’it tantu vitima no suspeitu sira mai hosi área Buibau,” Superintendente António de Sá hateten.

Tuir identifikasaun Komandu PNTL Baucau, alende  vitima nain-ida hakotu iis, iha konfrontu refere rezulta ema nain-ida mós kanek bainhira hetan tuda hosi ema deskoñesidu bainhira tuir dalan fila uma, enkuantu iha área seluk daudaun ne’e komando sei hein relatóriu hosi komandante eskuadra hosi postu admistrativu sira.

Notísia relevante: Komandu PNTL Baucau halo ona investigasaun ba kazu konfrontu Darsula

Jornalista: Natalino Belo

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here