Kandidatu Prezidente Repúblika períodu 2022-2027, Martinho Gusmão hala'o kampaña iha RAEOA. Imajen Tatoli/Abílio Elo Nini.

OÉ-CUSSE, 13 marsu 2022 (TATOLI) – Kandidatu Prezidente Repúblika períodu 2022-2027, Martinho Gusmão, domingu ne’e, hala’o kampaña ho tipu aberta iha Palaban, sub-rejiaun Pante Makasar Rejiaun Administrativa Espesiál O’e-Cusse Ambeno (RAEOA).

Kandidatu ho númeru sorteiu 13, ne’e kompromete bainhira eleitu sai Prezidente Repúblika ba períodu 2022-2027, sei serbisu hamutuk ho Governu atu investe iha revolusaun edukasaun, hatuur-hikas justisa iha nia fatin, haburas kultura dame-nian. 

Martinho Gusmão hatete, bainhira sai xefe Estadu primeiru sei halo revolusaun ba setór edukasaun, hadi’a kualidade edukasaun no dignifika direitu sálariu ba profesór.

“Sé bainhira ha’u eleitu karik, ha’u sei esforsu servisu hamutuk ho Governu atu hadi’a eskola-sira iha nívwl suku no aldeia, ne’ebé la dignu ona atu alunus-sira halo aprendizajen, promove produtu lokál liuhosi projetu ba merenda eskolár, kada munisípiu uza-nia produtu lokál hodi sai garantidu ba programa merenda eskolár iha munisípiu idak-idak, produtu lokál la-presiza mai hosi sentrál,”  Martinho Gusmão, ko’alia iha kampaña ne’e.

Tán ne’e kada suku tenke harii eskola di’ak-nian, no dignifika sálariu ba profesór hanesan kualidade ba edukasaun no funsionáriu, violénsia-sira mosu tanba laiha justisa sosiál.

Diretór CNE, Tomás Oqui Meta,  informa, monitorizasaun ba kampaña kandidatu Prezidente Repúblika períudo 2022-2027, iha Oé-Cusse la’o di’ak no hakmatek, maske iha domingu iha kandidatu maibé militante no simpatizante-sira hatudu maturidade polítika di’ak iha ámbitu kampaña.

“Ohin iha Oé-Cusse kandidatu rua mak hala’o kampaña ho oras hanesan, kandidatu númeru sorteiu 16 ho kandidatu númeru sorteiu 13, maibé ita haree situasaun la’o kapaas no hakmatek no laiha irregularidade,” nia katak.

Nia fó-sai katak, kandidatu-sira kumpre oráriu kampaña ne’ebé fó sai ona hosi órgaun eleitorál, nomoos kandidatu-sira aprezenta kompromisiu eleitorál, tuir vizaun no misaun prezidente repúblika, hodi hato’o mensajen ba povo-sira atu kria pás estabilidade hodi kontribui fó susesu ba festa demokrásia iha Timor-Leste.  

Tuir observasaun Agência Tatoli, iha komísiu ne’e hetan seguransa másima hosi PNTL-FDTL, observasaun internasionál hosi Uniaun Europeia (UE), CNE no Sekretariadu Tékniku Administrasaun Eleitorál (STAE) no Provedoria Direitu Humanu no Justisa (PDHJ). 

Jornalista   : Abílio Elo Nini

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here