Kandidatu Prezidente Repúblika, Tito da Costa Crstovão ‘Lere Anan Timur’ vizita no kari aifunan ba monumentu saudozu Nicolau dos Reis Lobato iha Aisirimou, municipiu Aileu. Foto Tatoli/ Argentina Cardoso

AILEU, 13 marsu 2022 (TATOLI)— Kandidatu Prezidente Repúblika ho númeru sorteiu ualu (8), Tito da Costa Cristovão ‘Lere Anan Timur’ halo vizita no kari ai-funan ba monumentu saudozu Nicolau dos Reis Lobato iha Aisirimou, munisípiu Aileu hodi husu bensa molok halo kampaña eleitorál.

“Ohin dia 13 ha’u mai iha ne’e rai Aileu, rai husar Aiserimou fatin istóriku ne’ebé saudozu Nicolau Lobato, Francisco Xavier do Amaral ho nia maluk sira seluk hamutuk ho Comite Central sira nu’udar mata-dalan ba ita nia povu maubere hotu no ohin loron sira la hamutuk ona ho ita”, Lere dehan ba jornalista iha Aisirimou, Aileu, domingu ne’e.

“Ha’u mai fó onra no gloria ba nia tau ai-funan husu sira nafatin atu tau matan ba povu no rai  ida ne’e no mós partikularmente ba ha’u ho apoiante sira atu bele lori ha’u ata ba Palásiu Prezidente Nicolau Lobato hodi sai nu’udar  aman ba nasaun no  sama tuir sira nia ain fatin”, deklara Lere.

Lere Anan Timur haktuir hikas durante nia kampaña, hahú husi Lorosa’e to’o Loromonu, mai hikas rai klaran Aileu, nu’udar Katóliku no Timoroan ne’ebé iha kultura, tradisaun, no nu’udar sarani sempre husu misa ba matebian sira ne’ebé ohin loron la hamutuk ona, tanba sira fakar sira nia ran no isin  ba rai doben Timor-Leste (TL).

“Ba matebian no eroi sira mos ha’u sei liuhusi sira nia rate, sira nia fatin osoáriu sira no   ha’u sei hamulak ba sira atu tau matan ba ha’u, no  rai TL no  povu ne’ebé terus durante  tinan 24 nia laran”, Kandidatu ho númeru sorteiu ualu ne’e haktuir.

Kandidatu Prezidenti ne’e mos husu polítiku sira lalika to’o sadik matebian sira, maibé tenke iha dever no obrigasaun hodi fó onra, gloria no konsidera sira hanesan eroi.

“Ha’u la’ós maupagadór. Ha’u lakohi sadik fali matebian sira ne’e, hanesan maluk sira seluk sadik to’o saudozu Nicolau Lobato ne’ebe nu’udar  naran lulik, naran todan ba Timor-Leste. Hanoin katak ha’u nia Aman, ha’u nia Mestre saudozu Nicolau Lobato hanesan mós sira seluk sei tau matan ba ita nafatin, sei lori ita ba dalan loos, hanesan saudozu Nicolau Lobato dehan katak A ultima bala é a minha vitoria. Ida ne’e mak ha’u hanoin katak ezemplu ida ne’ebé ita hatudu ba ita nia povu no rai ne’e”, hatete nia.

Nia kompromete katak bainhira sai PR tenke lori nasaun ida ne’e ba progresu dezenvolvimentu, “Ha’u husu ba matebian saudozu Nicolau Lobato to’o Francisco Xavier do Amaral hanesan mos nia maluk sira seluk, soldadu rihun ba rihun ne’ebé mate, hanoin katak sei tau matan ba ha’u no tula, fó matenek, brani no fó badinas ba ha’u atu lori nasaun ida ne’e ba oin di’ak liutan”, nia deklara.

Jornalista       : Cidalia Fátima

Editor             : Armandina Moniz

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here