Mapa munisípiu Baucau. Imajen infografia TATOLI/ Octávio de J.Guterres

DILI, 12 marsu 2022 (TATOLI)Komandante munisípiu Baucau, Superintendente Xefe Polísia, António de Sá, informa, Polísia Nasionál Timor-Leste (PNTL) munisipál halo ona investigasaun ba kazu konfrontu ne’ebé akontese sábadu ne’e, iha Darsula, suku Gariuai, postu administrativu Baucau villa, munisípiu Baucau.

Kazu konfrontu ne’e akontese, hafoin kampaña aberta Kandidatu Prezidente Repúblika (PR) hosi partidu FRETILIN, ho númeru sorteiu 06, Francisco Guterres ‘Lú Olo’.

“Daudaun Komandu PNTL Baucau halo ona investigasaun ba kazu ne’e no halo identifikasaun sasin balun hodi presta deklasaun hodi hetan autór prinsipál kazu ne’e,” Komandante munisípiu Baucau, hateten ba Agência TATOLI, via telefónika.

Notísia relevante: Os Verdes garante militante 50.000 resin vota ba Lú Olo

Nune’e, seidauk iha serteza númeru suspeitu ne’ebé envolve kazu tanba sei iha prosesu investigsaun.

“Agora Polísia sei buka tuir hela suspeitu sira. Ami seidauk bele fó sai detallu kazu ne’e, tanba ha’u konsentra hela ba kazu ida ne’e. Bainhira kazu ne’e loos ona, ha’u sei informa fali ba ita-boot sira,” nia akresenta.

Hosi kazu ne’e, rezulta joven ida hakotu iis, maibé Komandu PNTL seidauk bele fó sai identidade matebian tanba sei iha prosesu investigasaun nia laran.

“Ami sei buka hela motivu hosi kazu ne’e rasik, nune’e ita bele hatene loloos,” nia tenik.

Jornalista : Natalino Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here