Matebian, Manuel Pereira. Imajen/Espesiál

DILI, 12 marsu 2022 (TATOLI)—Komandu Polísia Nasionál Timor-Leste (PNTL) detein ona suspeitu EA ne’ebé halo lakon Manuel Pereira ho idade 30 nia vida, no tara matebian nia ulun iha ai leten iha suku Nunumoge, postu administrativu Hatubelico, munisípiu Ainaro.

“Hafoin suspeitu komete kazu ne’e, nia halai lakon, maibé iha tuku 17:30 ohin, nia rasik mai entrega-an fali ba ami no submete ba investigasaun. Agora ami detein kedan nia iha sela Komandu PNTL Ainaro,” Segundu Komandante munisípiu Ainaro, Superintendente Asistente, Mário Víctor, informa ba Agência TATOLI, sábadu ne’e.

Notísia relevante : PNTL investiga hela kazu omesídiu iha Liquiça

Ekipa kompostu hosi Xefe Investigasaun no membru sira balun rekolla ona dadus iha lokál akontesimentu.

“Matebian Manuel Pereira nia mate ne’e ulun laiha, tanba suspeitu ida oho matebian, ta’a matebian hanesan asasinatu,” nia tenik.

Hafoin ekipa sira tun hodi halo identifikasaun ba matebian nia mate isin, sira buka tuir matebian nia ulun no konsege hetan iha kilómetru ida hosi lokál akontesimentu.

“Suspeitu EA hafoin oho matebian, tesi matebian nia ulun hodi lori ba tara tiha iha ai-horis ne’ebé besik suspeitu nia uma,” nia konta tuir.

Tuir Segundu Komandante ne’e, kazu omesídiu no mutilasaun ne’e  liga ho problema pasadu entre matebian no suspeitu.

“Ami hetan informasaun katak antes ne’e, sira iha problema pasadu. Suspeitu halo torturasaun fízika hanesan sunu halimar matebian ne’e nia inan iha tinan  2000. Entaun iha tinan  2017 matebian Manuel Pereira, halo fali tentativu omesídiu hasoru suspeitu EA no matebian momentu ne’ebá konsege ta’a kanek suspeitu EA nia oin,” Superintendente Asistente, Mário Víctor, akresenta.

Ho nune’e  matebian Manuel Pereira konsege submete ba prosesu justisa tanba nia atus no konsege tama prizaun preventiva no hetan liberdade iha agostu tinan 2021.

“Hafoin ohin  matebian ne’e sa’e fali ba iha Koiloko, ba suspeitu nia uma, entaun iha ne’ebá maka tuir informasaun hosi viziñu sira, katak vítima tama ba haris fatin ba soe bee maka suspeitu iha li’ur hein ho katana ona. Entaun vítima konsege eskapa ka haksoit sai hosi haris fatin, maibé sira rua duni malu to’o mai iha lokál krime, kuaze kilómetru ida resin, suspeitu oho tiha vítima no ta’a kotu tiha kedan matebian nia ulun hodi ba tara iha ai leten,” Segundu Komandante munisipál esplika.

Enkuantu, mate isin Manuel Pereira, trasporta ona hosi munisípiu Ainaro mai Dili atu halo otópsia.

Jornalista : Natalino Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here