Ilustrasaun violénsia fízika. Imajen/Espesiál

COVALIMA, 12 marsu 2022 (TATOLI)—Organizasaun Naun Governamentál (ONG) Rekuperaaun Psikososiál no Dezenvolvimentu iha Timor-Leste (PRADET, sigla inglés) munisípiu Covalima rejista kazu violénsia fízika hamutuk 10 iha munisípiu Covalima, Ainaro no Manufahi, desde janeiru to’o marsu.  

Konselór Fatin Hakmatek PRADET Covalima, Cariana Elsa Amaral, hateten, kazu ne’ebé akontese ho tipu violénsia doméstika asaltu tolu, violénsia seksuál ba minoridade ida, no psiko-sosiál rua  akontese iha munisípiu Covalima, no kazu violénsia fízika haat akontese iha munisípiu Ainaro no Manufahi.

“Fatin Hakmatek PRADET Covalima halo ezaminazaun ba kazu hirak ne’e, enkuantu kazu psiko-sosiál mak la halo ezaminasaun, tanba vítima minoridade gravida bazeia ba rezultadu USG hosi óspital referál suai,” Konselor Cariana Elsa, informa Agência TATOLI, iha Suai Loro, sábadu ne’e.

Notísia relevante: ALFeLa fó asisténsia legál ba kazu violénsia doméstika iha Covalima

Objetivu Fatin Hakmatek PRADET halo ezaminasaun, atu hatene faktu no kanek ne’ebé mak iha vítima nia isin, hosi kazu sira hanesan violénsia doméstika, fizíka, no seksuál.

Nune’e, Konselór husu ba rede referál iha munisípiu Covalima, bainhira  akontese kazu hirak ne’e, tenke lori kedas vítima lalais ba Fatin Hakmatek hodi halo ezaminasaun.

“Ita labele halo ona ezaminasaun bainhira liu ona fulan-ida ka  rua, tanba labele hetan rezultadu di’ak. Tanba ne’e, bainhira akontese kazu foun lori mai hodi bele identifika suspeitu ne’ebé komete kazu no rejista iha kadernu protokolu hodi ba rejista iha Tribunál,” nia eplika.

Nia dehan, iha munisípiu tolu ne’e, iha doutór, parteira no enfermeira sira atu halo atendementu ezaminasaun ba vítima kazu violénsia seksuál no doméstika, ne’ebé halo kontaktu ba rede sira ne’ebé prontu atu halo atendimentu.

Bainhira identifika kazu, PRADET Covalima sempre halo atendementu no rejista prosesu iha Ministériu públiku (MP).

Funsionáriu ne’ebé serbisu iha Fatin Hamatek PRADET Covalima ne’e hamutuk na’in-10, kompostu hosi koordenadora na’in-ida, konselór na’in -rua, finansa na’in-ida, segurasan na’in-haat, mototista na’in-ida, no cleaner na’in-ida.

Jornalista : Celestina Teles

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here