COVALIMA, 12 marsu 2022 (TATOLI)—Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés) Covalima, sábadu ne’e, hahú prosesu verifikasaun buletin votu ne’ebé simu ona hosi nasionál.
“Brigada STAE hamutuk ho ofisiál CNE hahú ohin halo verifikaun ba buletin votu, ne’ebé sei ramata iha loron 17 marsu ne’e, molok distribui ba sentru votasaun,” Diretór STAE Covalima, Francisco Gusmão, hateten ba Agência TATOLI, iha ninia knaar fatin, Kampung-baru.
Antes ne’e, STAE Covalima simu ona materiál sensitivu no non sensitivu iha loron 11 marsu lorokraik tuku 18:00.
“Ita halo pakotementu materiál hodi distribui ba sentru votasaun iha postu administrativu sira,” nia akresenta.
Notísia relevante: STAE Covalima disponibiliza formasaun ba Brigada 80 hodi prepara ba ElPres
Materiál eleisaun sira hanesan buletin votu hamutuk livru 10.700, urna 240 no lista votante sidadaun sira atu ezerse direitu iha loron 19 marsu.
Tuir Diretór STAE munisipál ne’e, sei realiza seremónia ba prosesu distribuisaun materiál eleisaun ba sentru votasaun iha postu administrativu iha loron 18 marsu.
Atu transporta materiál hirak ne’e, STAE covalima identifika ona transporte 40, ne’ebé bainhira transporte la sufisiente mak sei aluga transporte bazeia ba nesesidade.
Tuir dadus, STAE rejista eleitór iha Covalima hamutuk 47.807, kompostu hosi mane 24.446 no feto 23.361.
Aleinde ne’e, STAE estabelese sentru votasaun iha rejiaun ne’e hamutuk 80 no estasaun votu 92.
Jornalista : Celestina Teles
Editora : Julia Chatarina
