Kandidatu Prezidente Republika, Armanda Berta dos Santos, akompaña hosi Konselliru Másimu partidu KHUNTO, José dos Santos Naimori Bukar, anima militante no apoiante sira iha kampu futeból, munisípiu Bobonaro, sábadu (12/03). Imajen TATOLI/Sérgio da Cruz

BOBONARO, 12 marsu 2022 (TATOLI)–Kandidatu Prezidente Repúblika (PR) períodu 2022-2027 hosi Partidu Kmanek Haburas Unidade Nasionál Timor-Oan (KHUNTO), ho númeru sorteiu 09, Armanda Berta dos Santos, sábadu ne’e, realiza kampaña aberta iha kampu futeból postu administrativu Maliana, munisípiu Bobonaro.

Iha biban ne’e, Armanda Berta, hato’o ninia kompromisu eleitorál, katak bainhira povu fó fiar ba nia, sei tau prioridade hodi promove iguladade justisa sosiál no inkluzaun hodi fó tratamentu hanesan ba povu hotu ho dignu no laiha diskrimisaun.

“Kompromisu ida-ne’e atubele garante povu hotu iha asesu hanesan ba justisa no laiha diskriminasaun ba kualkér sidadaun ida iha nasaun demokrátiku ne’e. Signifika povu tomak iha direitu ba tratamentu hanesan iha lei nia okos,” nia promote.

Notísia relevante: Sai Xefe Estadu, Armanda Berta prioritiza hametin identidade timor-oan

Kandidatu Prezidente Republika, Armanda Berta dos Santos, hato’o kompromisu eleitorál ba militante no apoiante sira iha kampu futeból, iha postu Maliana, munisípiu Bobonaro, sábadu (12/03). Imajen TATOLI/Sérgio da Cruz

Aleinde ne’e, Armanda Berta sei garante funsionamentu normál orgaun soberanu hanesan Parlamentu Nasionál, Governu no Tribunál, hodi ida-idak bele ezerse funsaun no halo tuir idak-idak ninia knaaar, ho prinsípiu separasaun poder tuir Konstituisaun haruka, ne’ebé la interven ba orgaun soberanu seluk ninia knaar no povu tomak nia, hodi hametin unidade pás no estabilidade nasionál.

Nia mós konsidera Xefe Estadu nu’udar símbolu nasionál, ne’ebé sei buka no promove diálogu bainhira mosu diverjénsia polítika ne’ebé fó ameasa ba integridade nasionál.

“Bainhira sai Xefe Estadu, ha’u garante sei laiha diskriminasaun no istigmasaun polítika pasadu nia, ba kualkér sidadaun no garante povu sei moris iha ambiente pás no estabilidade, atubele hadi’a vida, ne’ebé bele kore-an hosi kiak no mukit, hodi promove unidade nasionál,” Kandidatu PR ho númeru sorteiu 09 ne’e afirma.

Garante estabilidade internál

Armanda Berta mós promote sei garante polítika estabilidade internál, liuhosi funsionamentu no instrumentu Estadu forte, hodi bele garante andamentu dezenvolvimentu no liberdade sirkulasaun sidadaun nia durante 24 oras, nune’e bele hala’o vida negósiu sein tauk no hetan ameasa.

Liga ho polítika interna, Kandidatu PR ne’e mos sei hametin relasaun mútua ho parte Igreja katólika hodi bele promove diálogu atu haburas unidade nasionál entre grupu juventude sira.

Militante no apoiante partidu KHUNTO partisipa iha kampaña Kandidatu Prezidente Republika, Armanda Berta dos Santos, iha kampu futeból, postu Maliana, munisípiu Bobonaro, sábadu (12/03). Imajen TATOLI/Sérgio da Cruz

Atu hametin liután polítika interna ne’e, Berta konsidera knaar Prezidente Repúblika nu’udar Komandante Supermu Forsa Armada, ne’ebé sei fó atensaun másima ba dezenvolvementu área defeza no seguransa, hodi bele garante Estadu ninia soberanu, tamba ne’e sei fo hanoin nafatin ba Governu atubele kria kondisaun ne’ebé dignu ba instituisaun hanesan FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) nu’udar lutu nasaun hodi bele salva guarda no bali nafatin Estadu nia soberania.

“Atu hametin unidade no estabilidade nasionál hodi haburas pás no armonia, ita presiza hametin polítika interna no externa ne’ebé di’ak hodi dudu dezenvolvimentu di’ak ba oin, nune’e polítika hirak ne’e bele estável. Presiza jere polítika externa ne’ebé konstitente ho nasaun amigu sira hanesan Amérika, Japaun, Koreia, Portugal, Austrália, Indonézia no nasaun seluk ne’ebé durante ne’e fó apoiu ita, liuhosi kooperasaun bilaterál iha área ekonomia, edukasaun, agrikultura, saúde, siénsia teknolojia no sira seluk,” Armanda Berta dehan.

Nia konsidera, atu alakansa progresu no prosperidade povu tomak, presiza ambiente ne’ebé iha pás, tamba laiha pás sei laiha dezenvolvimentu atu nasaun hetan progresu no laiha pás povu sei la goja próspridade iha moris.

Kandidatu PR ne’e sei halo tuir misaun importante tolu hanesan sei hametin no bali Konstituisaun, ne’ebé sei hakruk no halo tuir Konstituisaun, hodi hametin Estadu direitu demokrátiku, nu’udar nasaun ne’ebé soberanu, ne’ebé harii hosi povu tomak ninia hakarak ho matan ben, ran no ruin.

Tuir Kandidatu hosi partidu KHUNTO ne’e, atu hametin Konstituisaun presiza hametin unidade no establidade nu’udar nasaun ukun rasik-an no presiza seguransa rai-laran, unidade, estabilidade no polítika nasionál sai nudar sasukat determinadu ba progresu dezenvolvimentu iha Timor-Leste atu lori povu ba moris di’ak hanesan nasaun sira seluk.

Koordenadór partidu KHUNTO munisípiu Bobonaro, Fransisco da Costa Tilman. Imajen TATOLI/Sérgio da Cruz

Biban ne’e, Koordenadór partidu KHUNTO munisípiu Bobonaro, Fransisco da Costa Tilman, promete sei esforsu no serbisu maka’as iha baze atu konvense militante no apoiante sira hodi bele fó forsa ba Kadidatu PR Armanda Berta, hodi hakat ba Palásiu Prezidente iha Aitarak-laran hodi serví povu tomak.

“Maluk sira, lalika tauk no lalika dúvida ona, tempu to’o ona atu ita lori ita-nia Inan ne’e sai Prezidente Repúblika na tinan-lima, tamba nia mós iha kapasidade bele hadi’a povu-nia moris, tamba nia daudaun ne’e kaer ukun no halo ona buat barak ba povu. Tanba ne’e, lalika fiar lia bososk sira, mai ita hamutuk lori ita-nia Kandidatu Prezidente Repúblika, ne’ebé defende povu nia direitu,” nia hateten.

Kampaña aberta ne’e hetan supervizaun hosi Komisaun Nasional Eleisaun (CNE, sigla portugés) Observadór Internásional hosi Uniaun Europeia (UE), Provedoria Direitu Umanu no Justisa (PDHJ, sigla portugés) no hetan apoiu seguransa hosi Polísia Nasionál Timor-Leste (PNTL) Komandu munisípiu Bobonaro.

Atividade ne’ebé hahú iha tuku 14:00 to’o tuku 18:00, hetan partisipasaun másimu hosi apoiante hamutuk 4.000 resin hosi postu administrativu Atabae, Balibo, Cailaco, Maliana, Bobonaro no Loloto’e.

Jornalista : Sérgio da Cruz

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here