Dageng Liu, Reprezentante WFP iha Timor-Leste.

Hosi: 

Dageng Liu, Reprezentante WFP iha Timor-Leste

Mundu tomak akompaña hela krize boot ne’ebé agora daudaun akontese iha Ukránia, situasaun ne’e bele iha kauza imediata ba parte hotu-hotu, no bele manifesta liuhusi krize presu ai-han globalmente.

Antes fulan neen liuba, Nasoens Unidas organiza Simeira Sistema Ai-han, nu’udar etapa ida ba solusaun transformativu atu atinji Objetivu Dezenvolvimentu Sustentável 2030. Ohin loron, nasaun barak mak enfrenta tan difikuldade ida konabá: krize presu ai-han rezulta husi konflitu iha Ukránia.

Iha semana primeiru fulan-marsu tinan 2022, folin produsaun granula sa’e globalmente to’o pursentu 60 kompara ho fulan kotuk, no konsidera sa’e maka’as dezde krize ai-han iha 2008, nu’udar kauza direta husi konflitu refere. Hanesan mós krize ai-han akontese iha tinan 2008, situasaun atuál bele afeta presu produsaun granula sa’e lalais iha tempu badak, inklui mós produtu ai-han bázika sira seluk hanesan batar no fore-keli.

Folin produsaun ne’ebé daudaun aumenta ne’e, sei piór liutan bainhira konflitu iha Ukránia kontinua, liuhusi elementu fundamentu rua: interrupsaun korrente fornesimentu no menus produsaun. Globalmente, produsaun granula mak hanesan segundu produsaun sereál barak liu hafoin batar, nune’e ninia komérsiu global boot tebes kompara ho produtu ai-han sira seluk.

Maibé ho situasaun atuál, komersiante sira labele uza ró atu tula no transporta produsaun refere husi Ukránia ba rai li’ur tanba portu taka hela. Hanesan segundu espotadór maioria ba produsaun granula, impaktu ba esportasaun produsaun refere afeta parte hotu-hotu, liga mós ho kestaun korrente fornesimentu ne’ebé antes ne’e akontese tiha ona ho impaktu husi pandemia COVID-19.

Importante tebes ba ita atu refleta, tanba produsaun granula hamutuk pursentu 25 maihusi Ukránia ho Rúsia. Maibé ho situasaun atuál, Ukránia nia agrikultór sira abandona sira nia fatin produsaun granula hodi sai fali fatin konflitu nian. Nasaun rua ne’e hanesan fornesedór prinsipál iha produsaun granula ba Indonézia, ne’ebé utiliza produtu refere nu’udar ingrediente importante hodi prodús supermie, trigu, no dose. Tanba importasaun produsaun granula ba Timor-Leste maioria maihusi Indonézia, entaun Timor-Leste mós sei enfrenta fornesimentu produsaun ne’ebé la balansu iha merkadu lokál sira.

Timor-Leste nu’udar nasaun ida ne’ebé depende ba importasaun husi rai li’ur, tanba ne’e situasaun refere sei afeta importadór sira, liu-liu liga ho (folin ba transportasaun/mina sei aumenta karun), nune’e bele fó presaun ba kustu no ikus mai afeta mós folin  ba konsumidór sira.

Foin lalais iha fulan-janeiru tinan 2022 ne’e, inflasaun anuál sa’e ba porsentu 5.4, persentajen ida ne’e konsidera aas tebes hafoin tinan 10, iha ligasaun ho aumentu komponente ai-han ba Índise Presu Konsumidór nian. Inflasaun ninia aumentu ne’e la’ós impaktu tranzitóriu ka bele atua ho lalais ho dezenvolvimentu globál atuál. Normalmente, populasaun iha área urbana no rurál mak sei afeta maka’as husi presu ai-han sa’e, tanba sira iha dependénsia ba merkadu atu hetan ai-han, no situasaun refere mós bele dezafia sira nia abilidade atu hetan ai-han tuir sira nia nesesidade.

Ida ne’e hanesan momentu di’ak atu refleta ita nia estratéjia polítika ba rezerva sereál, nu’udar substituisaun ba importasaun, no tempu di’ak mós ba protesaun sosiál atu bele halo mitigasaun ba impaktu, espesialmente ba populasaun vulneravel sira. (*)

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here