Ministru Ensinu Superiór Siénsia no Kultura, Longuinhos dos Santos. Imajen TATOLI/Egas Cristóvão

DILI, 11 marsu 2022 (TATOLI)–Ministériu Ensinu Superiór Siénsia no Kultura (MESSK) planeia prepara fundu empréstimu ba estudante sira ne’ebé laiha kapasidade hodi kontinua estudu iha nível lisensiatura no mestradu.

Ministru Ensinu Superiór Siénsia no Kultura, Longuinhos dos Santos, hateten, nível ensinu superiór importante tebes, tanba ne’e polítika VIII Governu Konstitusionál ba tinan ne’e sei prepara fundu empréstimu ba estudante sira.

“Ita elabora hela fundu empréstimu ne’e, fiar katak tinan ne’e bele finaliza hodi bele tau osan atu estudante sira ne’ebé laiha kapasidade finanseiru bele halo empréstimu hodi kontinua sira-nia estudu,” Ministru informa ba Agência TATOLI, iha edifísiu MESSK, Colmera, sesta ne’e.

Notísia relevante: FDCH fó ona bolsa estudu ba timor-oan 6.401 durante tinan-sia

Maski nune’e, Ministru seidauk hatene montante hira mak sei prevee iha fundu ne’e tanba iha faze esbosu hela.

“Bainhira finaliza ona mak sei aprezenta fali iha enkontru Konsellu Ministru hodi hetan aprovasaun. Fundu empréstimu ne’e sei uza hodi apoiu estudante iha rai-laran no rai-li’ur,” nia akresenta.

Governante ne’e konsidera, fundu ne’e importante tanba sei ajuda Fundu Dezenvolvimentu Kapitál Umanu (FDCH, sigla portugés) no Governu jere fundu ne’e ho di’ak.

“Kuandu estudante sira empresta, ikus mai tenke fó fali tuir taxa jurus ne’ebé sei termina. ita sei fó taxa jurus kiik ba estudante sira, atu sira uza halo investimentu iha edukasaun,” nia tenik.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here