Prezidente Interinu Conselho de Imprensa (CI), Expedito Dias Ximenes. Imajen/Mídia CI.

DILI, 11 marsu 2022 (TATOLI)—Prezidente Interinu Conselho de Imprensa (CI),  Expedito Dias Ximenes, husu ba jornalista sira ne’ebé atu halo atividade kobertura ba eleisaun prezidensiál ne’e tenke ho responsabilidade ba produtu jornalístiku ne’ebé oferese ba sosiedade.

“Meiu komunikasaun sosiál ka jornalista iha liberdade maibé asume responsabilidade ba produtu jornalístiku ne’ebé oferese ba sosiedade no povu tenke ho informasaun ne’ebé adekuadu no onestidade iha kobertura ba eleisaun prezidensiál 2022,” Prezidente interinu Conselho de Imprensa ne’e hateten iha serimónia Conselho de Imprensa de Timor-Leste servisu hamutuk ho Sekretariadu Tékniku Administrasaun Eleitorál (STAE), hodi entrega karta kredensiál vota movel ba jornalista 251 liuhosi reponsável órgaun no meiu komunikasaun sosiál sira iha Quintal Boot, Dili, sesta ne’e.

Iha kobertura ba kampaña eleitorál no eleisaun prezidensiál ne’e, nia dehan, importante mak jornalista sira tenke respeita kodigu étika jornalístika nune’e bele garante informasaun ne’ebé kualidade ba sosiedade.

Diretór Ezekutivu Conselho de Imprensa (CI), Rigoberto Monteiro, hateten Conselho de Imprensa Timor-Leste entrega kartaun kredensiál vota movel ba jornalista nasionál no internasionál sira-ne’e liuhosi halo verifikasaun ho kriteria ida mak jornalista sira tenke ativa iha órgaun komunikasaun sosiál.

“CI servisu hamutuk ho Sekretariadu Tékniku Adminitrasaun Eleitorál (STAE) atu verifika jornalista sira ba eleisaun movel nian no verifikasaun ne’e iha nia kritériu tolu (3) hanesan karteira profisionál, profisionál sira ativa iha órgaun komunikasaun sosiál no kartaun vasina kontra COVID-19,” Diretór Ezekutivu CI, Rigoberto Monteiro hateten.

Jornalista sira bele vota livre ho kartaun kredensiál ne’ebé atribui hosi Conselho de Imprensa (CI) no Sekretariadu Tékniku Administrasaun Eleitorál (STAE) iha terrenu bainhira hala’o kobertura iha períodu kampaña eleitorál hahú hosi 03-16 no eleisaun prezidensiál.

Diretór Ezekutivu ne’e haktuir tan, hosi órgaun komunikasaun sosiál sira-ne’ebé rejistu iha Conselho de Imprensa mak hanesan jornál, rádiu, televizaun no online hamutuk 21.

CI mós rejista jornalista Internasionál hamutuk 20 ne’ebé sei servisu hamutuk ho jornalista nasionál sira iha prosesu eleisaun ne’ebé akontese iha loron 19 marsu 2022.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here