BAUCAU, 11 marsu 2022 (TATOLI) – Estudante idade 12 to’o 17 iha Baucau sesta ne’e, hahú simu vasina pfizer hanesan parte prevensaun hasoru surtu Covid-19.
Eskola ne’ebé hahú lansamentu kampaña imunizasaun vasina pfizer mak Eskola Ensinu Báziku Sentrál (EBC, sigla portugés) Tirilolo, Baucau Vila ho tótal estudante hamutuk na’in-458 kompostu mane na’in-224, feto na’in-234 no booster hamutuk na’in-51.
Diretór Nasionál Apoia Servisu Ospitál Ministériu Saúde, Nilton da Silva, hateten, atividade ohin hanesan lansamentu ofisiál kampaña imunizasaun vasina pfizer ba labarik idade 12 to’o 17 no lansa booster ba komunidade iha Baucau.
“Objetivu mak ofisializa vasina ba idade 12 to’o 17 no ba booster nian,” Diretór Nasionál Apoia Servisu Ospitál Ministériu Saúde hateten iha EBC, Vila Antiga, sesta ne’e.
Vantajen hosi vasina pfizer atu hasa’e imunidade labarik no komunidade relasiona ho onda datoluk pandemia ne’ebé sa’e iha fulan-fevereiru.
Ministériu Saúde liuhosi ekipa advokasia kolabora hamutuk ho Ministériu Edukasaun, Juventude no Desportu (MEJD) liuliu diretór eskola sira atu oinsa hahú fó advokasia ba profesór, inan-aman no estudante sira atu hola-parte iha kampaña vasinasaun.
“Evidénsia hatudu vasina ba onda omicron foin lalais fó nia efeitu ne’ebé ita hotu haree iha ita-nia nasaun,” Nilton argumenta.
Diretór Servisu Munisipál Edukasaun, Augusto Ornai Ximenes, orienta ona dirijente eskola sira atu fornese dadus no kolobaora ho servisu munisipál saúde relasiona ho programa vasinasaun pfizer ba estudante sira.
“Liga ho idade eskolár, ami serbisu hamutuk ho serbisu munisipál saúde atu oinsa ekipa saúde rasik ba direita eskola sira nune’e bele fasil hetan labarik sira atu vasina,” Augusto Ximenes hateten.
Tuir tótal estudante Baucau ne’ebé partisipa iha kampaña vasinasaun pfizer hamutuk hotu na’in-21.802 hosi tótal eskola hamutuk 213 kompostu Ensinu Báziku sestu-anu, ensinu báziku sentrál no sekundária.
Jornalista : Natalino Belo
Editór : Evaristo Soares Martins
