Diretór Ezekutivu ANAAA, Edmundo da Silva Viegas. Imajen TATOLI/Egas Cristóvão

DILI, 11 marsu 2022 (TATOLI)­­­—Diretór Ezekutivu Ajénsia Nasionál Avaliasaun Akreditasaun Akadémiku (ANAAA), Edmundo Viegas, hateten, instituisaun ne’e hakarak inisia redús utilizasaun rurat-tahan no promove sistema eletrónika.

Inisiativa ne’e tanba ANAAA halo kolaborasaun ho Agência Tecnologia da Informação e Comunicação Timor, Institutu Públiku (TIC Timor, I.P) liuhosi nota entendimentu atu apoiu hadi’a jestaun sistema informátika internál instituisaun.

“Ami-nia serbisu ne’ebé halo iha tinan uluk uza métodu konvensionál ne’ebé buat hotu tenke liuhosi surat-tahan, maibé ba oin ho TIC Timor, I.P nia apoiu, buat barak maka sei informatiza no dijitaliza hodi hahú promove kultura redusaun uzu surat-tahan hodi hakat de’it ba sistema eletrónika,” Diretór Ezekutivu ANAAA, Edmundo da Silva Viegas, dehan iha salaun Ian Martin Instituto Nacional de Formação de Docentes e Profissionais da Educação de Timor-Leste (INFORDEPE), Balide, sesta ne’e.

Notísia relevante: TIC Timor, I.P fasilita serbisu ANAAA iha komponente rua

Aleinde ne’e, bainhira hahú dezenvolve sistema informátika, bele fasilita prosesu avaliasaun inklui estabelesimentu baze dadus ne’ebé rekolla hosi instituisaun ensinu superiór sira tanba ANAAA hanesan ajénsia reguladora ba ensinu superiór, ho misaun prinsipál halo avaliasaun no akreditasaun ba instituisaun no kursu sira.

“Daudaun ne’e, avaliasaun ANAAA ninia dokumentu referénsia bázika maka relatóriu auto avaliasaun hosi universidade sira. Tanba ne’e, ami ezije ba universidade sira atu submete mai ANAAA inklui númeru estudante no profesór kada tinan, rekursu no infraestrutura ne’ebé maka apoiu ba prosesu ensinu aprendizajen iha instituisaun ensinu superiór,” nia tenik.

Nune’e, ajénsia ne’e hakarak kolabora ho TIC Timor, I.P hodi tulun aselera ninia serbisu atu halo avaliasaun no akreditasaun ba instituisaun no kursu sira.

Enkuantu, akordu ne’ebé ANAAA halo ona ho parseiru ba tempu naruk tanba bele garante dadus no informasaun sensitivu no la sensitivu sira.

“Ho TIC Timor, I.P nia tulun, ba futuru atividade ne’ebé ajénsia Estadu sira halo bele partilla ba malu,” Diretór Ezekutivu akresenta.

Kooperasaun entre ajénsia Estadu rua ne’e laiha fundu, ho servisu hanesan web hosting no server iha TIC Timor, I.P, ne’ebé hanesan patrimóniu Estadu prontu apoiu ho ninia rekursu rasik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here