Prezidente Tribunál Rekursu, Deolindo dos Santos. Imajen Tatoli /Antonio Dasiparu

DILI, 10 marsu 2022 (TATOLI)— Supremu Tribunál Justisa (STJ) liuhosi Tribunál Rekursu (TR), kinta ne’e, deside realiza eleisaun Prezidensiál iha Austrália.  

Desizaun Tribunál Rekursu ne’e, hafoin halo analiza ba rekursu ne’ebé aprezenta hosi kandidatura nain-rua kompostu hosi kandidatu Prezidente Repúblika ho númeru sorteiu 6, Francisco Guterres “Lú-Olo” no kandidatu PR ho númeru sorteiu 14, José Ramos Horta, ne’ebé  husu atu anula desizaun Komisaun Nasionál Eleisaun (CNE) liuhosi diliberasaun ne’ebé la autoriza halo eleisaun iha Austrália tanba viola konstitusaun RDTL.

“Ami simu sira nia rekursu ne’ebé husu ba Tribunál Rekursu atu anula desizaun CNE ne’ebé la autoriza realiza eleisaun iha rai liur liuliu Austrália no seluk maka husu Tribunál Rekursu atu deklara katak desizaun CNE ne’e kontra konstitusaun RDTL,”  Prezidente TR, Deolindo dos Santos, liuhosi konferénsia imprensa ne’ebé  hala’o iha Caicoli-Dili.

Notísia relevante: MNEK prontu fasilita STAE-CNE realiza eleisaun iha Austrália

Tanba, Komisaun Nasionál Eleisaun (CNE) halo desizaun atu labele realiza elisaun prezidensiál iha Austrália ne’e viola direitu fundamentál sidadaun nian atu ezerse nia direitu votu.

“Hafoin analiza rekursu ne’e, ami deklara desizaun CNE ne’e nulu. Ho razaun fundamentu CNE labele foti ona desizaun ona iha besik eleisaun. Tanba ami hato’o konkluzaun ida katak viola konstitusaun RDTL artigu 47, númeru 1, nune’e tribunál deside kontinua realiza eleisaun iha Austrália,” Prezidente TR ne’e akresenta.

TR deside ona hodi autoriza órgaun eleitorál hanesan Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE) atu halo preparasaun téknika hodi realiza eleisaun Prezidensial iha Austrália.

Tribunál Rekursu notifika ona CNE, STAE no Prokuradór Jerál Repúblika kontinua realiza eleisaun iha diáspora atu sidadaun sir abele ezerse nia direitu votu iha loron 19 marsu tinan ne’e.

Notísia relevante: STAE komunika ona MNEK halo preparasaun ba fatin votasaun iha diáspora

 Jornalista: Natalino Costa

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here