Responsável Saúde Ambientál Munisípiu Baucau, Cesaltina Fraga Hornai/Natalino Belo.

BAUCAU, 10 marsu 2022 (TATOLI) – Suku Uaiga’e, Postu Administrativu Vemase deklara área livre Área Soe Fo’er Abiru (ALFA) hafoin ekipa verifikasaun Planu Asaun Komunidade Saneamentu Ijiene (PAKSI) hala’o verifikasaun ba uma komunidade hamutuk 83.

Responsável Saúde Ambientál Munisípiu Baucau, Cesaltina Fraga Hornai, esplika Vemase atinje ona pursentu 75 hosi tótal suku 7, suku Uaiga’e mak deklara ona ALFA. Enkuantu suku haat seluk sei re-verifika tanba antes ne’e uma-kain rua to’o lima uza sintina ida.

Enkuantu suku Ossoala seidauk bele verifika tanba kondisaun estraga no limitasaun trnsporte no suku Vemase Tasi sei suspende hela.

“Suku Uaiga’e livre ona tanba komunidade nia uma hotu iha sintina no uza sintina,” nia informa ba Agência Tatoli iha Vila Antiga, kinta ne’e.

Tuir dadus Suku Uaiga’e iha aldeia rua hanesan Lari tótal uma-kain 43 hosi uma 63 ho tótal populasaun na’in-253, aldeia mota tótal uma 40 hosi uma-kain 64 ho totál populasaun 263.

Suku lima seluk hanesan Cicua, Loilubo, Ostico, Uaiga’e no Uatolari hosi tótal uma 1.030, tótal uma-kain 1.416, tótal populasaun 6.673 seidauk bele deklara ALFA tanba sei re-verifika.

Hosi parte postu administrativu Venilale iha suku tolu hanesan Fatulia, Uai-laha no Baduho’o hosi tótal uma 1.064, tótal uma-kain 1.406, tótal populasaun 6.410 mak iha faze verifikasaun, maibé seidauk bele deklara ALFA tanba seidauk prienxe kritéria.

Enkuantu postu administrativu haat seluk ne’ebé seidauk verfika mak hanesan Baucau Vila tótal uma 9.201 hosi uma-kain 11.718, Laga tótal uma 3.106 hosi uma-kain 4.332, Baguia tótal uma 2.133 no Quelicai tótal uma 6.414.

“Postu tolu hanesan Baguia, Laga no Quelicai seidauk tanba distánsia, kondisaun estrada afeta hosi mudansa klimátika maibé la signifika uma hotu laiha sintina,” Cesaltina argumenta.

Ekipa verifikasaun munisípiu kompostu hosi saúde munisípiu, servisu munisípiu bee no ambiente, edukasuan no autoridade postu admistrativu ne’ebé halo serbisu verifikasaun tuir fatin ne’ebé determina.

PAKSI implementa iha postu admistrativu neen tótal suku 59 no aldeia hamutuk 281, iha suku 58 seidauk bele deklara ALFA tanba suku ida iha uma ualu ba leten laiha sintina, balun aat, uma-kain rua ba leten uza sintina ida no uma balun laiha sintina

Objeitvu hosi PAKSI mak haree liu ba mudansa ema-nia hahalok oinsá atu moris iha ijiene hanesan iha sintina no uza sintina nune’e prevene moras hanesan Insfesaun Respiratóriu Aguda (ISPA), Má-nutrisaun, diárea no rumbringa.

Cesaltina hateten, difisil atu muda ema-nia hahalok atu moris tuir ijiene maibé parte responsável programa kontinua esforsu atu muda hahalok oinsá uza saneamentu ho loloos.

Inísiu 2019 hahú implementa programa refere, komunidade barak antusiazmu, maske laiha apoia materiál konstrusaun ba saneamentu tanba komunidade ne’ebé iha kbi’it natoon bele konstrui rasik sintina permanente no semi-permanente maibe sira-ne’ebé laiha forsa uza materiál lokál ho durasaun to’o deit fulan tolu ka neen.

“Agora daudaun ita foin sa’e ba pursentu 60 maibé programa ne’e ita implementa iha suku 59 aldeia 281, ita hakarak uma hotu iha sintina no uza sintina mak foin dehan 100%,” Cesaltina akresenta.

Mateéia importante ne’ebé parte saúde sosializa ba komunidade mak uma ida mínimu iha sintina no uza sintina, fase-liman beibeik ho sabaun.

Baucau seidauk ansi atu deklara ALFA nível munisipál, tanba importante mak oinsá komunidade iha nível aldeia, suku to’o postu implementa no tau importánsia ba saneamentu no uza sintina ona mak foin verifika hodi deside Baucau bele deklara ALFA.

Kritéria atu atinje ALFA hosi Organizasaun Mundiál Saúde (OMS) katak membru família neen ba karaik tenke uza sintina ida, maibé neen ba leten tenke uza sintina rua tanba razaun bainhira membru família barak sei fó impaktu nune’e iha membru família balun sei uza alternativa tradisionál.

Entertantu programa PAKSI hahú implementa iha Baucau tinan 2019 no tuir planu sei remata iha tinan 2022, maibé tanba razaun pandemia surtu covid-19 programa refere kontinua implementa to’o 2023.

Antes ne’e Uniaun Europeia prevee orsamentu hamutuk millaun $10 ba Ministériu Saúde atu asegura inan isin-rua, promove ai-han lokál no hadi’a saneamentu bázika.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here