Sekretáriu Rejionál ba Asuntu Agrikultura, José Eta. Imajen Tatoli/Abílio Elo Nini.

OÉ-CUSSE, 10 marsu 2022 (TATOLI) – Diresaun Rejionál Agrikultura, Rejiaun Administrativa Espesiál Oé-Cusse Ambeno (RAEOA) daudaun ne’e prepara planu atu diversifika produtu agríkola iha rai-laran hodi redus dependénsia ba importasaun.

Sekretáriu Rejionál ba Asuntu Agrikultura RAEOA, José Eta, hatete, atu hamenus produtu importasaun, daudaun ne’e parte agrikultura halo koordenasaun ho Sekretaria Rejionál Asuntu Komérsiu no Indústria, halo identifikasaun hodi akumula dadus ba hahán bázika, ne’ebé kada semana no fulan tama iha Oé-Cusse hanesan foos no ayam potong no hahán seluk.

Nune’e, bainhira dadus kompletu, autoridade sei halo komparasaun entre produtu impotasaun ho produsaun rai laran hira, mak foin propoin ba autoridade atu estabelese baze legál ida, tanba sasán importasaun sei la hapara maibé ninia rekizitu atu hatama presiza estabelese regulamentu liuliu ba hahán fabrikadu.

“Tán ne’e parte agrikultura sei esforsu atu diversifika produtu agrikola, la’ós haree no batar de’it maibé inklui hahán abut-sira hanesan kumbili, ai-farina, fehuk, no hahán nitrogen fore-keli, fore-mungu no fore-rai, hahán sira-ne’e agora agrikultura hamutuk ho parseiru United Nation Development Programme (UNDP), Organizasaun Naun Governamentál (ONG) World Neighbor (WN) no projetu Hasa’e Produtividade Agrikultura Sustentável (HAPAS), dezenvolve ona iha fatin-fatin, liuhosi grupu agrikultura sira,” José Eta, dehan ba Agência Tatoli iha Oé-Cusse, kinta ne’e.

Nia informa, durante ne’e kontribui uza fundu rasik dezenvolve floresta iha konsevasaun, tán ne’e maka diresaun agrikultura kontinua programa ne’e, UNDP parseiru ho autoridade hodi dezenvolve ortikultura iha sub-rejiaun Pante Makasar ba suku Cunha, Lalisuk.

Kafé ne’e dezenvolve liuhosi grupu agrikultura iha suku Costa, aldeia Lakufoan, iha sub-rejiaun Pásabe dezenvolve ba produtu derok liuhosi grupu agrikultura hetan apoia téknika hosi estensionista-sira.

Projetu HAPAS, iha tinan 2022 ne’e Governu liuhosi Ministériu Agrikultura no Peska serbisu hamutuk ho Autoridade RAEOA apoia fasilidade teknolojia post-kolleta ba grupu tarjetu agríkola hamutuk 37.

Projetu HAPAS ne’ealoka orsamentu dolar amerikanu $88.800 ba ekipamentu teknolojia post-kolleta ne’ebé distribui ba grupu benefisiáriu (grupu tarjetu) maka hanesan mákina multi-funsaun bele mákina dulas batar no haree, unidade 111, dasi ka timbangan unidade 111 no bidón plástiku 60 litru unidade 1,110 grupu benefisiáriu iha suku 6 bazea ba proposta ne’ebé submete ba iha HAPAS.

Grupu benefisiáriu kompostu hosi suku Naimeko grupu hitu, Bobometo grupu 14, suku Usi-Tasa’e grupu hitu, suku Usi-Taqueno, suku Banafi grupu haat no suku Malelat grupu tolu. Enkuantu hosi suku neen ne’e maka alvu ba benefisiáriu hamutuk 37.

Objetivu hosi apoia ekipamentu hirak-ne’e atu fasilita grupu to’os na’in bele dulas batar sai batar u’ut no dulas hare iha grupu laran no bele asesu iha merkadu. Fasilita grupu tarjetu sira atu asegura rai fini ne’ebé garante kualidade, hanesan esforsu kontribui dezenvolve produsaun rai laran.

Nia fó ezemplo, daudaun ne’e parseiru ONG lokál ida daudaun ne’e hahú halo to’os modo tantu tempu bailoronn no udan nia funsionamentu fó atendimentu nafatin ba komunidade ne’ebé presiza modo, no ida iha suku Lifau grupu feto-sira mak jere, ida-ne’e mak sei multiplika iha fatin seluk tán.

“Dadus alimentár epoka 2021-2022, ba área natar kultiva ektare 4,597, no área kolleta ektare 4,485, ba área batar époka 2021 área kultiva ektare 6,596 no área kolleta 6,567, no rezultadu ita-nia produsaun hare-kulit iha Oé-Cusse tonelada rihun 17 envolve haree rai-maran no natar, ho nia ekivalente tonelada rihun 10 sai foos, ba produsaun batar nia produsaun iha Oé-Cusse hamutuk tonelada rihun 10,” nia katak.

Bazea ba dadus estatístika hosi sensu populasaun no uma-kain 2015 hatudu katak proporsaun uma-kain iha suku 18 iha Oé-Cusse tomak wnvolve iha produsaun agríkola hatudu katak uma-kain sira atinje ona 80-100%.

Notisia relevante: RAEOA sei investe iha protesaun sosiál ba feto rurál

Jornalista: Abílio Elo Nini
Editór:Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here