Diretór Provedória Direitu Umanu no Justisa (PDHJ) hosi Delegasaun Territoriál Oé-Cusse, Paulo Ribeiro. Imajen Tatoli/Nelson de Sousa.

OÉ-CUSSE, 10 marsu 2022 (TATOLI)—Diretór Provedória Direitu Umanu no Justisa (PDHJ) hosi Delegasaun Territoriál Oé-Cusse, Paulo Ribeiro, informa tuir sira-nia monitorizasaun ne’e identifika duni funsionáriu públiku iha rejiaun ne’e partisipa iha kampaña eleitorál hosi kandidatu Prezidente Repúblika sira ne’ebé realisa iha Oé-Cusse.

“Iha Oé-Cusse kampaña kandidatu PR foin hala’o na’in-tolu (3) no ami-nia ekipa monitorizasaun identifika funsionáriu públiku balun envolve direta kampaña eleitorál iha terenu,” Diretór PDHJ RAEOA ne’e hateten ba Agência iha nia knar fatin, RAEOA, kinta ne’e.

Tuir nia, mekanizmu halo monitorizasaun mak monitoriza iha terrenu hodi rekolla funsionáriu públiku nia identidade no halo dokumentusaun forografia no video, nune’e loron tuir mai sei halo konfirmasaun ho superiór instituisaun katak funsionáriu ne’e hetan kuñesimentu ka iha autorizasaun lisensa ka lae.

Nia la esplika detallu dadus funsionáriu públiku hira mak envolve tuir ajenda kampaña ne’ebé hahú hosi loron 02-09 marsu tanba la fiksa, maibé sei halo konfirmasaun liután ho superiór hosi instituisaun sira hodi bele hatene.

Bazea ba estatutu Komisaun Funsan Públika bainhira funsionáriu sira hola parte iha kampaña eleitorál, sira hato’o pedidu ba KFP no tenke husu pedidu lisensa anuál, lesensa lahó vensimentu no lisensa espesiál.

Tuir lei, envolve hanesan militante ka hanesan ekipa susesu no bainhira ekipa susesu mak autorimatikamente tenke submete pedidu lisensa espesiál lahó vensimentu ba Komisaun Funsaun Públika (KFP) hetan autorizasaun.

“Barak liu envolve iha loron feriás ka fim de semana ne’e la kontra lei. Maibé iha tipu rua mak ita presiza haree hanesan se sira ba partisipa hanesan simpatizante ka seluk sira envolve hanesan ekipa susesu mak automatikamente tenke iha pedidu lisensa espesiál,” nia dehan.

Tuir supervizaun identifika ona hanesan partisipa nu’udar militante no ida-ne’ebé hanesan sai ekipa susesu maiória laiha pedidu lisensa, no to’o ohin loron Funsaun Públika Rejiona Oé-Cusse seidauk simu pedidu ruma, nune’e konsidera sei iha indisíu hela no prosesu nia laran ba oin halo inkeritu kle’an mak hatene viola lei ka lae.

Antes ne’e PDHJ ho koordenasaun ho Dirasaun Rejional Funsaun Públika halo edukasaun sivíka ba funsionáriu públiku iha Oé-Cusse hodi hasa’e kuñesimentu liga ho envolvimentu iha periódu kampaña eleitorál nia laran.

Nune’e mós Diretór CNE, Oé-Cusse, Tomas Oqui Meta, hateten CNE nia kompeténsia mak supervizona de’it prosedimentu lei eleitorál kampaña kandidatu tuir regra ka lae, no kona-ba envolvimentu funsionáriu públiku nafatin koordena ho parte PDHJ no KFP iha RAEOA ne’e.

Jornalista : Nelson de Sousa

Editór   : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here