Diretora PDHJ Delegasaun Territoriál Baucau, Joanita Silveira da Costa. Imajen Tatoli/Natalino Belo.

BAUCAU, 10 marsu 2022 (TATOLI) – Provedoria Direitu Umanu no Justisa (PDHJ, sigla portugés) Delegasaun Territoriál Baucau rejista keixa hamutuk 13 hosi komunidade munisípiu tolu.

Provedoria Direitu Umanu no Justisa (PDHJ) Delegasaun Territoriál Baucau liderada Joanita Silveira da Costa, rejista keixa hirak-ne’e hahú janeiru to’o inísiu marsu 2022.

“Hosi keisa hirak-ne’e barak-liu hosi munisípiu Baucau hamutuk keixa 11, Manatuto ida no Lautém ida,” Diretóra PDHJ Delegasaun Territoriál Baucau, Joanita Silveira da Costa ko’alia  iha Vila Nova, kinta ne’e.

PDHJ Baucau kategoriza keixa ualu ba violasaun direitu umanu no keixa kona-ba violasaun ba boa governasaun hamutuk lima.

PDHJ Baucau sei submete ba diresaun asisténsia públika nasionál hodi rejista no kontinua ba diresaun investigasaun, nune’e ofisiál invetigadór sira halo avaliasaun dahuluk no sei submete ba komité jestaun keixa kompostu hosi provedór, adjuntu no diretór asuntu públika atu deside.

“Liuhosi enkontru mak foin deside informasaun ka keixa sira-ne’ebé hato’o hosi komunidade, rekomenda hosi ofisiál invetigadór sira tama ba PDHJ nian ka lae,” Joanita esplika.

Nia subliña, komité mak sei deside keixa hirak-ne’e kategoria ba kazu ka lae, bainhira tama kategoria sei kontinua investigasaun maibé iha indikasaun krime PDHJ sei submete ba Ministériu Públiku (MP).

Joanita fó-sai katak, prosesu normál ba keixa hirak-ne’e ho durasaun fulan-neen tanba presiza rekolla dadus, evidénsia ligada ho keixa ne’ebé hato’o hosi komunidade.

PDHJ nafatin nakloke ba komunidade no entidade sira seluk atu hato’o keixa relasiona ho violasaun direitu umanu no boa governasaun bazea ba papél PDHJ nian.

PDHJ Delegasaun Territoriál Baucau hala’o kna’ar iha munisípiu haat hanesan Baucau, Viqueque, Lautém no Manatuto. PDHJ hala’o kna’ar tuir Kontinuasaun RDTL artigu 27 atu hatán ba preokupasaun sidadaun nian hasoru entidade públika tuir no hala’o kna’ar bazea ba estatutu PDHJ nian ( Lei n.º 7/2004, de 20 de maio).

Papél Provedoria Direitu Umanu no Justis (PDHJ) nu’udar  órgaun independente ho funaun apresia no esfosu fó satisfasaun ba keixa sidadaun sira-nian kontra podér públiku sira, verifika konformidade atus tuir lei, inklui halo prevensaun no inisia prosesu hotu iha reparasaun injustisa.  PHHJ bele desizóriu (foti desizaun) dirije ba órgaun kompetente ho rekomendasaun bazea ba keixa ne’ebé hato’o hosi komunidade no entidade relevante sira.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here