Estudante UNTL, Veronica Amaral no Zelia Soares Freitas, faan “Es Buah” iha Largo Lecidere. Imajen Tatoli/Nelia Fernandes.

DILI, 10 marsu 2022 (TATOLI)—Estudante barak mak gosta hein no tane liman ba inan-aman bainhira mak haruka osan ba sira, maibé ba estudante feto ida hosi Universidade Nacional Timor Lorosa’e (UNTL) ne’e la gosta xateia nia inan-aman hodi buka moris no buka osan rasik iha kapitál Dili.

Estudante Veronica Amaral hosi suku Matahoi, postu administrativu Uatulari, Munisípiu Viqueque ne’e, la’o buka moris hodi kontra ninia an rasik atu halakon sidade Dili nia manas no mundi dijitalizasaun, nia la’o hisik kosar hodi buka osan rasik ho doit-metan balun ne’ebé ninia inan-aman haruka ba nia atu hatutan ninia moris hodi halo negósiu kiik faan “Es Buah”.

“Atividade faan es buah ne’e inisiativa mai hosi ha’u no ha’u-nia kolega eskola. Tanba agora tempu feriadu, entaun ami aproveita tempu ida-ne’e hodi buka moris faan es buah, nune’e osan ne’e bele uza ba ami-nia presiza loro-loron nian hanesan ba selu bemo no uza ba eskola. Tanba, daudaun ne’e ha’u hela dook hosi ha’u-nia familia,” Veronica Amarál hateten ba Agência Tatoli iha ámbitu feto iha mundu tomak selebra “Loron Mundiál Feto”, iha Jardin Largo Lecidere, Dili, tersa ne’e.

Bainhira nia haree iha tempu feriadu nia kolega estudante sira tuur mangal halimar sira-nia Hand Phone (HP) hosi dadeer to’o kalan, nia hahú mehi no hato’o ninia ideia kreativa ba ninia feto maluk Zelia Soares Freitas atu tau osan hamutuk hodi hola ai-fuan hanesan hudi, apel, ai-fuan lata no avokate hodi nakfilak ai-faun hirak ne’e sai “Es Buah”.

“Ami rua tau osan hamutuk hanesan ema ida tau $10 hodi hola ai-fuan sira ne’e hamutuk $15 dolár. Hosi ai-fuan sira ne’e, ami uza ba loron rua, hanesan ami uza balun no balun ami rai ba aban hodi halo fali es buah, no la’o lemo-lemo iha jardin sira iha sidade Dili atu faan,” nia haktuir.

Maske iha hakarak ida ne’ebé lahó moe la’o hosi jardin ida ba jardin seluk hodi leba es buah faan ba konsumedór sira, hosi rezultadu faan ne’e dalaruma loron ida tomak, nia bele hetan $19,50 no dalaruma tanba rai udan entaun ema sosa de’it balun no balun tenke lori fila ba uma.

“Osan ne’ebé ami hetan, ami uza fali hodi hola ai-fuan ne’ebé atu halo ba es buah ne’e no restu ami rai hamutuk hodi uza baa mi-nia nesesidade loro-loron nian,” nia dehan.

Maske iha hakarak ne’ebé boot hodi hala’o atividade negósoiu ne’e ho domin no responsabilidade, maibé dalaruma “hakarak” no “domin” ne’e sai mihis no hamihis hosi dalaruma ema la sosa no dalaruma ema haree no hatudu oin buis.

“Ne’e mak difikuldade ne’ebé ami hasoru. Maibé ami rua enkoraja malu hodi pasiénsia simu esperiénsia hirak ne’e katak hala’o atividade ne’e ho pasiénsia atu nune’e ita-nia negósiu ne’e bele ba oin,” nia dehan.

Iha kada loron 08 fulan-marsu, ema iha mundu selebra “Loron Mundiál Feto” ho atividade oioin, Veronica Amaral ho nia maluk Zelia Soares Freitas selebra ho la’o hadulas Dili hodi faan sira-nia “Es Buah” bae ma sira-ne’ebé buka anin tuur iha jardin sira hanesan Jardin Largo Lecidere, )5 de Maio, Jardin Prezidente Repúblika B.J. Habibie no jardin sleuk tan.

“Ha’u husu ba feto maluk sira-ne’ebé hakarak halo negósiu, labele moe no tauk, tanba liuhosi negósiu ne’e bele atende netik ita-nia presiza loro-loron nian. Ita labele garantia ba inan-aman de’it, tanba dala ruma ita dook hosi inan-aman susar ita atu husu osan hodi sosa ita-nia nesesidade loro-loron nian. Tanba ne’e lalika moe no tauk atu halo negóisu, tanba liuhosi atividade hirak ne’e bele aguente netik nesesidade uitoan iha kapitál Dili,” nia apela.

Veronica Amaral hanesan oan-ikun hosi maun-alin na’in-lima hosi inan-aman Adelino Ribeiro (matebian) no Olimpia Soares ne’e, tenke badinas buka moris hodi sustenta an tanba nia hatene hosi maun-alin sira-ne’e só nia ho nia maun de’it mak hetan oportunidade bele eskola tanba ninia inan-aman mesak agrikultór.

“Iha ami-nia familia ne’e, feto rua, mane tolu no ha’u mak ikun. Agora ha’u tenke buka moris rasik tanba ha’u-nia aman mate ona no agora hela mesak ho ha’u-nia mama, entaun ha’u tenke ajuda ha’u-nia inan,” nia dehan.

Veronica Amaral daudaun ne’e, eskola iha Universidade Nasionál Timor Lorosa’e (UNTL) no nia maun eskola iha Dili Institute of Technology (DIT). Iha UNT, nia foti Fakuldade Ekonomia no Jestaun iha Departamentu Kontabilidade no agora semestre hitu (7) ona.

Labele mo’e halo negósiu

Entretantu, relasiona ho Loron Mundiál Feto, ne’ebé iha mundu tomak selebra, negosiante fato ida iha jardin Largo Lecidere, Helena da Costa, enkoraja feto iha Timor-Leste labele moe halo atividade negósiu, nune’e bele sustenta familia.

Helena da Costa. Imajen Tatoli/Nelia Fernandes.

Komemora Loron Mundiál Feto loron ne’e (tersa, 08 marsu), ha’u husu ba feto maluk sira labele mo’e no tauk atu faan sasán, tanba ita feto labele tuur hodi hein mane sira mak lori osan mai mak ita uza, maibé ita feto mós tenke brani hamriik faan sasán atu oinsá ita bele hetan osan hodi fó ba oan sira ba eskola,” Helena da Costa hateten ba Agência Tatoli, iha jardin Largo Lecidere, tersa ne’e.

Moris iha kapitál Dili, nia dehan, presiza servisu no halo servisu tanba moris iha Dili ne’e moris karun be karun. Hateke ba leten, lalehan mesak aas be aas. Hateke tun ba rai, rai sama la borus. Nune’e, hakarak ka lakohi, feto presiza hamrik ajuda laen (mane) sira hodi buka osan nune’e bele sustenta família uma laran.

“Lalika moe atu faan sasán, tanba ita na’ok no debe mak ita mo’e, maibé ita halo negósiu hosi buka moris ne’e ita lalika mo’e. Tanba ne’e, loron ohin hanesan loron ba feto, ita presiza halo dezenvolvimentu liuhosi ita-nia atividade sira hanesan halo negósiu, nune’e bele kontribui ba prosesu dezenvolvimentu iha ita-nia rai,” nia dehan.

Nune’e, nia husu Governu liu-liu ba Jestaun Merkadu atu labele duni no foti negósiante sira-nia sasán, tanba ho negósiu no liuhosi atividade faan sasán ne’e mak sir abele sustenta moris no selu ona sira-nia eskola.

“Tanba antes ne’e ami faan sasán iha ne’e, ekipa Jestaun Merkadu mai duni no foti hotu ami-nia sasán sira hodi tau ba karreta, lori ba ne’ebé ami la hatene, maibé agora sira la mai foti ona. Ne’ebé, agora ita hein eleisaun besik ona ne’e, ita-nia Governu ida sa’e ne’e atu duni ami nafatin ka lae,  atu haree fali fatin di’ak ba ami hodi buka moris,” nia hateten.

Dadeer sai hosi uma, loron tomak faan iha Jardin Largo Lecidere, to’o iha loromatan subar-an ne’e, dalaruma nia só bele hetan de’it rendimentu $2 ka $3 no diferensa tebes ho tempu uluk ne’ebé kada loron bele hetan rendimentu di’ak.

“Iha tempu uluk iha loron ida, ita bele hetan $10 to’o $15, maibé agora araska tanba ema barak mak faan ona iha fatin ne’e, entaun loron ida ita bele hetan $2 ka $3, Sorte di’ak mak ita bele hetan $7 ka $8 ne’e, se lae ho tempu udan hanesan ne’e araska. Ne’ebé loron ohin nian, ha’u hetan $2 de’it,” nia dehan.

Ho rendimentu ne’e, uza ba nesesidade la to’o tanba agora rendimentu ladun di’ak tanba sasán la folin, maibé sasán hanesan bee no sigaru ne’e ema sosa uitoan.

“Difikuldade ne’ebé ha’u hasoru mak ne’e, ema ladun sosa. Tanba ho tempu udan hela de’it halo ema la mai pasear iha Largo, ho ida ne’e ami triste uitoan,” nia hateten.

Helena da Costa mai hosi suku Soba, postu administrativu Laga, munisípiu Baucau, ne’ebé daudaun ne’e hela iha suku Fatuhada, aldeia 03, postu administrativu Comoro. Nia hela hamutuk ho nia oan na’in-rua (feto ida no mane ida). Elena da Costa oan ikun hosi maun alin hamutuk na’in-12.

Helena da Costa hahú halo nia atividade negósiu iha 2001, ne’ebé faan uluk iha Merkadu Lama, no iha 2001 ne’e Governu liuhosi Jestaun Merkadu muda negósiante iha merkadu lama mai fali iha Largo Lecidere, nune’e iha 2008 to’o agora nia halo atividade negósiu iha Largo Lecidere.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here