Prezidente KRAM, Octavio Pereira, hala’o sensibilizasaun iha ESG Palaban. Imajen Tatoli/Abílio Elo Nini.

DILI, 10 marsu 2022 (TATOLI)— Prezidente Komisaun Reguladora Artemarsial (KRAM), Octaviano da Conceição Perreira, hateten sira nia parte seidauk autoriza organizasaun Persaudaran Setia Hati Terate (PSHT) atu hala’o atividade treinamentu, maske hetan ona legalidade hosi Diresaun Notariadu Ministériu Justisa  ne’ebé públika ona iha jornál Repúblika.

“Sira hosi PSHT haruka ona karta ida mai ami, liuhosi sira nia Prezidente Baltazar Lemos atu husu autorizasaun hala’o atividade, maibé ha’u informa ba sira liuhosi telefónika katak seidauk iha autorizasaun atu PSHT bele hala’o atividade treinamentu iha territóriu nasionál bainhira KRAM seidauk autoriza,” Prezidente KRAM ne’e hateten ba Agência TATOLI iha nia knar fatin -Lecidere, kinta ne’e.

Notísia relevante:   KRAM halo re-ajustamentu ba estrutura organizasaun arte marsiál iha RAEOA

Dalan Ida Reativa Arte-Marsiál Mak Kontribui Estabilidade

Nune’e, KRAM hato’o ona informasaun ba líder PSHT hotu katak hein hasai segunda diretiva hodi delega kompetensia ba sub-KRAM sira iha munisipiu hotu atu halo fiskalizasaun ba estabelesimentu sede organizasaun nian, fatin treinamentu hafoin KRAM fó autorizasaun hala’o treinamentu.

Entretantu, KRAM mós simu ona informasaun antes ne’e hosi PSHT katak iha fulan-marsu nia laran estrutura sira sei realiza kongresu ordináriu. Ho nune’e bainhira ramata ona kongresu mak KRAM foin bele autoriza halo abertura ba sentru treinamentu hotu iha territóriu nasional.

“Ha’u husu ba lideransa PSHT hotu kontinua kontrola sira nia membru atu labele halo treinamentu subar-subar hein tan uitoan atu bele hetan ona autorizasau, maibé lakoi kumpre mak Polisia Nasionál Timor-Leste (PNTL) bele uza rezolusaun númeru 4/2020 hodi halo atuasaun ba sira nia atividade hirak ne’ebé sei konsidera hanesan aktu ilegál tanba seidauk hetan autorizasaun hosi KRAM,” nia afirma.

Iha fulan ne’e, KRAM sei hasai ona segunda diretiva no sei públika iha Jornál Repúblika foin bele hare mekanizmu ba implementasaun formasaun no treinamentu ba PSHT hodi hala’o.

“Segunda diretiva hasai iha pontu lubuk ida mak iha laran, dezemina uluk diretiva ne’e ba sub-KRAM sira, autoridade kompetente sira no líder PSHT rasik saida mak sira bele halo bainhira hala’o atividade,” nia trelata.

Tuir dadus ne’ebé membru grupu arte marsiál PSHT submete ba KRAM ho totál membru hamutuk 60.000-resin iha Timor-Leste.

Notísia relevante:  KRAM Sosializa Regra Arte Marsiál Ba PSHT, IKS ho KORK

Jornalista: Hortencio Sanchez

Editór     :  Florencio Miranda Ximenes

PUBLISIDADE HUSI MTCIiklan

1 KOMENTÁRIU

HAKEREK NO HATÁN

Please enter your comment!
Please enter your name here