Kandidatu Prezidente Repúblika, Tito Da Costa Cristóvão ‘Lere Anan Timur’. Imajen Tatoli/Celestina Teles.

COVALIMA, 10 marsu 2022 (TATOLI)—Kandidatu Prezidente Repúblika ho númeru sorteiu ualu (8), Tito da Costa Cristovão ‘Lere Anan Timur’, hateten bainhira povu fó vitória iha eleisaun 19 fulan-marsu no eleitu sai Prezidente Repúblika mak nia sei pronunsia ba Governu  hodi haloot restu mortál sira ne’ebé agora daudaun sei rai hela iha ossoáriu.

Apoiante kandidatu Prezidente Repúblika, Tito Da Costa Cristóvão ‘Lere Anan Timur, iha kampaña eleitorál ne’ebé realiza iha Kampu Ladi, Covalima. Imajen Tatoli/Celestina Teles.

“Ita haree iha fatin-fatin iha ossoáriu ne’ebé fatin atu haloot mate-ruin ema-ne’ebé  fakar raan ba rai ida-ne’e, maske tinan 20 ona, restu mortál sira-ne’e kontinua rai iha Ossoáriu ne’ebé ha’u bolu hanesan armajen. Se ha’u eleitu sai PR, ha’u sei propoin ba Governu atu haloot restu mortál sira-ne’ebé sei rai iha Ossóariu iha Ainaro, Covalima, Bobonaro, Baucau, Lautém no Viqueque,”  Lere Ana Timur hato’o liuhosi kampaña eleitorál ba dala-sia (9), iha kampu Ladi, kinta ne’e.

Tuir nia, Governu promete atu konstrui simetériu iha munisípiu sira maibé ninia prosesu la’o neineik liu no to’o ohin loron restu mortál hosi luta-na’in no funu-na’in sira-ne’ebé mate ba rai ida-ne’e, sei kontinua rai nafatin iha Ossoáriu.

“Jadim dos Heroi Metinaro foin iha kondisaun maibé sira seluk seidauk iha kondisaun. Ha’u sei fó prioridade ba ita-nia éoi sira-ne’e, tanba sira mate mak sai éroi. Tanba ne’e, husu ba veteranu sira tenke tane aas dignidade hodi fó onra no gloria, sira fakar sira-nia raan, ita sai nasaun ida ne’ebé soberanu no independente,” nia dehan.

Iha kampaña ba dala-sia ne’e, Lere promete sei halo esforsu hodi sujere ba Governu atu lori fila Don Martinho Lopes nia restu mortál ne’ebé rai hela iha Portugal, la’ós ida-ne’e de’it maibé ba sira seluk tanba tinan 20-resin ona mós seidauk lori fila.

“Iha ha’u-nia mandatu atu ramata, ha’u la rezolve hotu problema veteranu maibé rezolve balun atu veteranu sira moris ho dignu,” nia hateten.

Aleinde rezolve problema veteranu sira-nian, nia mós hakarak promove rekonsiliasaun tanba munisípiu Covalima ho Bobonaro fronteira ho Indonézia, nune’e bainhira atu hakmatek tenke hala’o rekonsiliasaun.

Apoiante kandidatu Prezidente Repúblika, Tito Da Costa Cristóvão ‘Lere Anan Timur, iha kampaña eleitorál ne’ebé realiza iha Kampu Ladi, Covalima. Imajen Tatoli/Celestina Teles.

“Ha’u sei promove rekonsialisaun, ita la’ós atu lori malu ba tribunál maibé ita tuur hamutuk hodi nahe biti boot ba dame, hodi husu ita-nia maluk sira sorin ne’ebá rekunese sala nu’udar timor-oan, liu-liu inan aman sira-ne’ebé moris iha fronteira. Ita sai Timor ida de’it, maske nasaun ketak ona,” nia dehan.

Iha komísiu ne’e superviziona hosi Komisaun Nasionál Eleisaun, Provedoria Direitu Umanu no Justisa (PDHJ) no obervadór internasionál hodi haree prosesu hotu, inklui Lei Eleitorál nian hodi bele fó susesu ba iha kampaña tinan ida-ne’e.

Durante kandidatu sira hala’o kampañia eleitorál iha munisípiu Covalima Polísia, Nasionál  Timor-Leste (PNTL) fó seguransa masímu durante kandidatu sira hala’o kampaña eleitorál.

Jornalista : Celestina Teles

Editór      :  Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here