Porta vóz ekipa susesu kandidatura Prezidente Repúblika 2022-2027, Francisco Guterres, Lú-Olo, Fernando Dias Gusmão. Imajen Tatoli/Antonio Dasiparu

DILI, 10 marsu 2022 (TATOLI)— Prezidente Repúblika, Francisco Guterres Lú-olo, nia mandatu hahú hosi 2017 to’o 2022, hametin relasaun bilaterál hodi simu karta krendénsial hosi Embaixadór sira ne’ebé reprezentante nia nasaun  hodi rezidente no la rezidente iha Timor-Leste hamutuk 82.

Reprezentante Legál ekipa susesu  Kandidatu PR ho númeru sorteiu 6,  Fernando Dias Gusmão, hateten durante mandantu kandidatu Prezidente Francisco Guterres Lú-olo hametin relasaun bilateral di’ak tebes ho nasaun dezenvolvidu sira iha mundu.

Notísia relevante:  Kooperasaun bilaterál-multilaterál sai programa prinsipál ba  Lú-Olo

“Ita nian Prezidente  Republika komesa nia mandatu iha tinan 2017 to’o loron ohin (10/03),  simu karta kredénsial hosi Embaixadór hosi nasaun sira ne’ebe destaka iha ita nia rai Timor-Leste  hamutuk 82,” Fernando Gusmão hateten liuhosi konferénsia imprensa iha sede kandidatu Prezidente Repúblika  hosi Partidu FRETILIN iha Luz-Clarita, kinta ne’e.

Durante mandatu, Prezidente Repúblika Lú-Olo nian mós fó pose ba Embaixador Timor-Leste nian ne’ebé atu repezenta Estadu Timor-Leste iha rai-liur hamutuk 28.

“Hosi ida ne’e hatudu katak funsionamentu órgaun Prezidensia Republika, ita nian Prezidente hala’o nafatin ninian knaar no kompeténsia iha área relasaun internasionál nian,” nia akresenta.

Maske, iha mandatu Xefe Estadu Francisco Guterres Lú-Olo la halo vizita kortezia ba nasaun sira seluk hodi partisipa direta enkontru altu nivél iha rejional no internasional tanba situsaun balun.

Maibé, nuudar Prezidente Repúblika kumpre nafatin konstitusaun hodi fortalese relasaun internasionál liu telekoferénsia hanesan foin daudaun halo enkontru virtuál ida ho Sekretáriu Jerál ASEAN ninian hodi esforsu Timor-Leste atu sai membru ASEAN. Tanba, liuhosi enkontru ne’e Kamboja fó komitementu atu apoia Timor-Leste adere ba ASEAN.

Notísia relevante:   Eleitu ba PR, Lú-Olo promete kontinua serbisu ho Governu-PN hodi dezenvolve TL

Alende ne’e, Parlamentu Nasionál mós la fó aseitasaun atu PR Lú-olo ba hasoru ho Amo Papa iha nasaun Roma.

Maske ne’e, nuudar Xefe Estadu kontinua halo relasaun di’ak hodi hasoru reprezentante Santa Sé iha  Timór no Xefe Estadu hakarek karta ba Amo Papa atu husu disponibilidade vizita Timor-Leste, nune’e  Amu Papa aseita hodi vizita Timor-Leste iha tempu badak.

Tanba ne’e, Fernando Gusmão rejeita iha kampaña balun deklara durante mandatu Prezidente Repúblika nia lori Timor-Leste nia imajen monu iha mundu.

Iha aspetu demokrasia Rejiaun Asia Pasífiku kuaze nasaun 40-resin, Timor-Leste tama iha kategória ka klasifikasaun númeru hitu, signifika katak demokrásia buras tebes iha país ne’e.

Enkuantu kona-bá kombate korrupsaun, Timor-Leste okupa númeru 82 iha mundu no di’ak liu kompora ho Indonézia, Filipina, Brazil no Guine Bisau.

Notísia relevante:  Lu Olo sei halakon korrupsaun no dignifika estatuta RAEOA

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here