Diretór PDHJ Territoriál Bobonaro, Domingos Pinto Tavares. Imajen Tatoli/Sérgio da Cruz.

BOBONARO, 10 marsu 2022 (TATOLI) — Dekretu-Governu númeru 3/2022, 10 janeiru, alterasaun dahuluk hosi Dekretu-Governu númeru 5/2017, 27 fevereiru, ne’ebé regulamenta kampaña no propaganda eleitorál bandu kandidatu sira prátika insulta no halo difamasaun ba kandidatu seluk.

“Iha kandidatu balu halo kampaña tipu diálogu, iha mós kampaña komísiu. Bazea ba rezultadu monitorizasaun ami deteta kandidatu númeru sorteiu (6) kuaze la aprezenta programa maibé insultu, ba kandidadatu numeru (8) ko’alia duni programa, maibé horisehik fila insulta malu barak,” Diretór Provedoria Direitu Umanu no Justisa (PDHJ, sigla portugés) Delegasaun Territoriál Bobonaro, Domingos Pinto Tavares, informa Agência Tatoli, iha Maliana, kinta ne’e.

Diretór PDHJ Bobonaro ko’alia bazea ba Dekretu-Governu númeru 3/2022, 10 janeiru, artigu 13 (Proibisaun) númeru 1 hateten, durante kampaña eleitorál proibidu uza linguajen orál hanesan atentatória kontra instituisaun Estadu no unidade Repúblika Demokrátika Timor-Leste.

Nune’e mós bandu insitadora violénsia, difamatória relasaun ho kualkér kandidatu ka sidadaun no bandu halo diskriminasaun ba rasa, ideolojia, fiar relijioza, pozisaun sosiál no kualkér faktu ne’ebé atente kontra direitu umanu.

Númeru 2 hosi  Dekretu-Governu númeru 3/2022 ne’e mós mensiona, matéria propaganda eleitorál labele tau iha edifísiu públiku, relijiozu no privada sein autorizasaun hosi na’in.

Bandu mós halo propaganda eleitorál iha edifísiu públiku ka lokál ne’ebé konsidera nu’udar patrimóniu nasionál no fatin hirak-ne’ebé difikulta tráfegu no vizibilidade.

Númeru 3 hosi Dekretu Governu ne’e mós argumenta, kandidatu sira labele oferese grafikasaun, nein promesa kona-ba rekompensa ba eleitór sira.

Nia dehan, dadus hirak-ne’ebé rekolla dadaun ne’e relata ona ba PDHJ nasionál atu halo rezumu hodi halo análize situasaun nune’e bele hato’o xamada ba parte kompetente liuhosi ajdunta provedora, nune’e bainhira kampaña fila-fali labele akontese tán irregularidade hirak-ne’e.

Ho nene’e, Diretór PDHJ Bobonaro husu ba kandidatu na’in-rua atu kumpre paktu unidade nasionál ne’ebe asina ona nune’e eduka apoiante ho programa no estratéjia polítika ne’ebé trasa ona iha prioridade.

“Loloos ne’e tempu ohin loron povu atu rona sira-nia programa, sira-nia polítika, estratéjia, sira-nia vizaun no misaun, nune’e bainhira iha loron 19 marsu povu hakat ba sentru votasaun, sira  hatene ona ida-ne’ebé mak ninia vizaun di’ak no programa di’ak,” nia fó hanoin.

Diretór PDHJ Bobonaro ne’e mós nota katak durante atividade kampaña eleitorál iha kandidatu balun ne’ebé mai hosi jerasaun tuan la aprezenta programa, maibé koalia barak-liu ko’alia istória pasada.

Maibé nia dehan, kandidatu ho númeru sorteiu 16 mak iha kampaña eleitorál foka ba programa, estratéjia politika ne’ebé nakonu ho edukativu.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here