Ekipa hosi IOM halo avaliasaun ba fatin evakuasaun identifikadu ba dezastre naturál iha Viqueque, iha salaun administrasaun munisipál, kinta (10/03). Imajen TATOLI/Vitorino Lopes da Costa

VIQUEQUE, 10 marsu 2022 (TATOLI)—Organizasaun Internasionál Migrasaun (IOM, sigla inglés) halo avaliasaun ba sentru evakuasaun 10 ne’ebé ekipa hosi Komité Distritál Jestaun Dezastre (DDMC, sigla inglés) identifika, hodi prepara ba risku dezastre naturál iha postu Viqueque villa, munisípiu Viqueque.

“Ohin IOM halo enkontru ho liña ministeriál no ekipa hosi komisaun Komité Distritál Jestaun Dezastre iha Viqueque sira, ne’ebé identifika fatin evekuasaun 10 foun iha postu Viqueque villa,” Asistente Senior Jestaun Projetu IOM, Elvis Agustino Sarmento, hateten hafoin ramata atividade, iha salaun administrasaun munisipál, kinta ne’e.

Notísia relevante: Janeiru-fevereiru, Protesaun Sivil Viqueque rejista uma-kain 29 afetadu dezastre naturál

Nune’e, ekipa sei halo avaliasaun ba kondisaun fatin hirak ne’e no bainhira iha nesesidade atu hadi’a mak parte IOM sei haree hodi prepara ba dezastre naturál ho eskalaun boot.

“Ami diskute ona ho parte DDMC Viqueque tanba sira maka durante ne’e responsável ba risku dezastre naturál iha munisípiu ne’e no sira garante katak fatin 10 ne’e seguru ba kualker tipu dezastre,” Elvis Agustinho akresenta.

Daudaun Viqueque foin estabelese sentru evakuasaun ida maibé ho padraun internasionál, tanba ne’e presiza aumenta fatin.

“Ita iha esperiénsia hanesan akontesementu dezastre naturál ho eskalaun boot iha loron 4 abríl 2021, ne’ebé ema barak sai vítima tanba hela fatin a’at, ita lahatene atu koloka vítima sira ba ne’ebé tanba laiha preparasaun ba fatin evakuasaun. Tanba ne’e, ita halo preparasaun bázika ida hodi DDMC Viqueque bele hatene no halo koordenasaun ho entidade relevante hodi utiliza fatin evakuasaun ne’e,” nia tenik.

IOM rasik identifika katak sei kria fatin evakuasaun ida iha suku Uma-tolu no halibur estutura suku hodi halo simulasaun dezastre naturál.

Atividade ne’e hetan partisipasaun hosi Protesaun Sivil, ekipa DDMC no liña ministeriál sira iha munisípiu Viqueque.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here